സവർക്കറുടെ ദേശസ്നേഹം തലമുറകൾക്ക് പ്രചോദനം; നിർഭയനായ വിപ്ലവകാരിയെന്ന് ഉപരാഷ്ട്രപതി സി.പി. രാധാകൃഷ്ണൻ

പോർട്ട് ബ്ലെയർ: ആൻഡമാൻ നിക്കോബാർ ദ്വീപുകളിലെ സെല്ലുലാർ ജയിൽ സന്ദർശിച്ച് ഉപരാഷ്ട്രപതി സി.പി. രാധാകൃഷ്ണൻ. ഇന്ത്യയുടെ സ്വാതന്ത്ര്യത്തിനായി ത്യാഗം സഹിച്ച സ്വാതന്ത്ര്യസമര സേനാനികൾക്ക് അദ്ദേഹം ശ്രദ്ധാഞ്ജലി അർപ്പിച്ചു. രക്തസാക്ഷി സ്തംഭത്തിൽ പുഷ്പചക്രം അർപ്പിച്ച ഉപരാഷ്ട്രപതി, വീർ സവർക്കർ തടവിൽ കഴിഞ്ഞിരുന്ന സെല്ലിലും ശ്രദ്ധാഞ്ജലി അർപ്പിച്ചു. തുടർന്ന് സ്വതന്ത്ര ജ്യോതി, സെൻട്രൽ ടവർ, തൂക്കുമരം, മ്യൂസിയം, പ്രദർശന ഗാലറി എന്നിവ സന്ദർശിച്ചു. സ്വാതന്ത്ര്യസമരത്തിന്റെ വീരോചിതമായ ചരിത്രം അവതരിപ്പിക്കുന്ന ലൈറ്റ് ആൻഡ് സൗണ്ട് ഷോയും അദ്ദേഹം വീക്ഷിച്ചു.

വീർ സവർക്കറെ അതുല്യനും നിർഭയനുമായ വിപ്ലവകാരി എന്നാണ് സി.പി. രാധാകൃഷ്ണൻ വിശേഷിപ്പിച്ചത്. സവർക്കറുടെ ദേശസ്നേഹം തലമുറകളിലെ യുവാക്കളെ പ്രചോദിപ്പിച്ചതായും അദ്ദേഹം പറഞ്ഞു.സെല്ലുലാർ ജയിലിലെ സവർക്കറുടെ തടവുജീവിതവും നേരിട്ട കഠിനമായ പീഡനങ്ങളും അനുസ്മരിച്ച ഉപരാഷ്ട്രപതി, സ്വാതന്ത്ര്യസമര സേനാനികളെ തളർത്തുകയെന്നതായിരുന്നു ബ്രിട്ടീഷ് ഭരണകൂടത്തിന്റെ ലക്ഷ്യമെങ്കിലും സവർക്കർ ഒരിക്കലും നിരാശനായില്ലെന്ന് വ്യക്തമാക്കി. തൊട്ടുകൂടായ്മയ്ക്കും സാമൂഹിക വിവേചനത്തിനുമെതിരായ പോരാട്ടത്തിലും സവർക്കർ നൽകിയ സംഭാവന അദ്ദേഹം ചൂണ്ടിക്കാട്ടി.

ഭാരതം കൂടുതൽ ശക്തമാകുന്നത് മറ്റുള്ളവരോട് നിബന്ധനകൾ നിർദേശിക്കാനല്ലെന്നും, ലോകത്ത് ആരും ഇന്ത്യയെ ആജ്ഞാപിക്കാൻ കഴിയാത്ത സാഹചര്യം ഉറപ്പാക്കുന്നതിനാണെന്നും സി.പി. രാധാകൃഷ്ണൻ പറഞ്ഞു. അതാണ് യഥാർത്ഥ സ്വാതന്ത്ര്യമെന്നും അദ്ദേഹം വ്യക്തമാക്കി.

രണ്ട് ദിവസത്തെ ആൻഡമാൻ നിക്കോബാർ സന്ദർശനത്തിന്റെ ഭാഗമായാണ് ഉപരാഷ്ട്രപതി സെല്ലുലാർ ജയിൽ സന്ദർശിച്ചത്. വിജയ പുരത്തെ ഐ.എൻ.എസ്. ഉത്ക്രോഷിൽ എത്തിയ അദ്ദേഹത്തെ ലെഫ്റ്റനന്റ് ഗവർണർ അഡ്മിറൽ ദേവേന്ദ്ര കുമാർ ജോഷി (റിട്ട.) ഉൾപ്പെടെയുള്ള മുതിർന്ന ഉദ്യോഗസ്ഥരും വിശിഷ്ട വ്യക്തികളും ചേർന്ന് സ്വീകരിച്ചു. ഉപരാഷ്ട്രപതിക്ക് ആചാരപരമായ ഗാർഡ് ഓഫ് ഓണറും നൽകി.

സന്ദർശനത്തിന്റെ ഭാഗമായി ‘ഹർ ഘർ തിരംഗ’ പരിപാടിയുടെ ഉദ്ഘാടനത്തിലും അദ്ദേഹം പങ്കെടുക്കും. കൂടാതെ നേതാജി സുഭാഷ് ചന്ദ്രബോസ് ദ്വീപും ഉപരാഷ്ട്രപതി സന്ദർശിക്കും.