പരീക്ഷാ തട്ടിപ്പുകൾക്ക് കടുത്ത പൂട്ട്;കേന്ദ്രം നിയമം കടുപ്പിക്കുന്നു;തടവും പിഴയും അനുഭവിക്കണം !

ദില്ലി : നീറ്റ് ചോദ്യപേപ്പർ ചോർച്ചയുമായി ബന്ധപ്പെട്ട് രാജ്യത്തുടനീളം വിദ്യാർത്ഥി പ്രക്ഷോഭം ശക്തമായി തുടരുന്നതിനിടെ, പരീക്ഷാ തട്ടിപ്പുകൾക്കും ചോദ്യപേപ്പർ ചോർച്ചയ്ക്കുമെതിരെയുള്ള നിയമങ്ങൾ കൂടുതൽ കർശനമാക്കാൻ കേന്ദ്ര സർക്കാർ ഒരുങ്ങുന്നു. കുറ്റക്കാർക്കുള്ള ജയിൽ ശിക്ഷയും പിഴത്തുകയും കുത്തനെ കൂട്ടാനാണ് സർക്കാരിന്റെ നീക്കം.’പൊതുപരീക്ഷാ (അനഭിലഷണീയ മാർഗ്ഗങ്ങൾ തടയൽ) നിയമം, 2024′ (Public Examinations (Prevention of Unfair Means) Act, 2024) ഭേദഗതി ചെയ്യാൻ സർക്കാർ പദ്ധതിയിടുന്നു .ഇതുസംബന്ധിച്ച പ്രഖ്യാപനം കേന്ദ്ര മന്ത്രിസഭാ യോഗത്തിന് ശേഷം ഉണ്ടാകാൻ സാധ്യതയുണ്ട്.

പേപ്പർ ചോർച്ച കേസുകൾ വിചാരണ ചെയ്യുന്നതിനായി അതിവേഗ കോടതികൾ (Fast Track Courts) സ്ഥാപിക്കാനുള്ള പ്രത്യേക വ്യവസ്ഥ ഭേദഗതിയിൽ ഉൾപ്പെടുത്തും. ഇതിനായി ഡൽഹി ഹൈക്കോടതി ഉത്തരവിറക്കിയിട്ടുണ്ട്. നിലവിൽ തട്ടിപ്പുകളിൽ പങ്കാളികളാകുന്ന വ്യക്തികൾക്ക് 3 മുതൽ 5 വർഷം വരെ തടവും 10 ലക്ഷം രൂപ വരെ പിഴയുമാണ് ശിക്ഷ. ഇത് വർദ്ധിപ്പിക്കാനാണ് നീക്കം.സംഘടിത ചോദ്യപേപ്പർ ചോർച്ച കേസുകളിൽ നിലവിലുള്ള 5 മുതൽ 10 വർഷം വരെയുള്ള തടവും 1 കോടി രൂപ കുറഞ്ഞ പിഴയും കൂടുതൽ കർശനമാക്കും. ക്രമക്കേടുകൾ റിപ്പോർട്ട് ചെയ്യാത്ത സർവീസ് പ്രൊവൈഡർമാർക്ക് 1 കോടി രൂപ വരെ പിഴ ചുമത്താനും വ്യവസ്ഥയുണ്ട്. വെള്ളിയാഴ്ച ചേരുന്ന മന്ത്രിസഭാ യോഗത്തിന്റെ അംഗീകാരം ലഭിച്ച ശേഷം വരുന്ന തിങ്കളാഴ്ച ഭേദഗതി ബിൽ ലോക്‌സഭയിൽ അവതരിപ്പിക്കും.

“ചോദ്യപേപ്പർ ചോർച്ച എന്നത് സാധാരണ വിഷയമല്ല. ലക്ഷക്കണക്കിന് വിദ്യാർത്ഥികൾക്കും അവരുടെ കുടുംബങ്ങൾക്കും ഇത് വളരെ വേദനാജനകമാണ്. കുറ്റവാളികളെ പിടികൂടി ജയിലിലടച്ചിട്ടുണ്ട്. കേസുകൾ വേഗത്തിൽ തീർപ്പാക്കാൻ ഫാസ്റ്റ് ട്രാക്ക് കോടതികൾ സ്ഥാപിക്കാൻ വകുപ്പുകൾക്ക് നിർദ്ദേശം നൽകിയിട്ടുണ്ട്.”എന്നും പ്രധാനമന്ത്രി നരേന്ദ്ര മോദി വീഡിയോ സന്ദേശത്തിൽ അറിയിച്ചു .
22 ലക്ഷത്തോളം വിദ്യാർത്ഥികളുടെ ഭാവിയെ ബാധിക്കാത്ത രീതിയിൽ ഉടനടി പരീക്ഷകൾ സംഘടിപ്പിക്കാൻ പൂർണ്ണ സജ്ജീകരണങ്ങൾ നടപ്പാക്കിയിട്ടുണ്ടെന്ന് സർക്കാർ അറിയിച്ചു.