യുഎൻഎ തട്ടിപ്പ്; ജാസ്മിൻ ഷായുടെ കുരുക്ക് മുറുകുന്നു: തട്ടിപ്പ് ആസൂത്രിതമെന്ന് കൈംബ്രാഞ്ച്

തിരുവനന്തപുരം: നഴ്‌സ് കൂട്ടായ്മയായ യുണൈറ്റഡ് നഴ്സസ് അസോസിയേഷനിലെ സാമ്പത്തിക ക്രമക്കേട് ആസൂത്രിതമെന്ന് ക്രൈംബ്രാഞ്ച്. ഒന്നാം പ്രതി ജാസ്മിന്‍ ഷാ ഉള്‍പ്പെടെയുള്ളവര്‍ ആസൂത്രിതമായി തട്ടിപ്പ് നടത്തിയെന്നും വിശ്വാസ വഞ്ചന കാട്ടിയെന്നും ക്രൈംബ്രാഞ്ച് എഫ്ഐആറില്‍ ഉള്ളതായാണ് സൂചന. ഒരു പ്രമുഖ മാധ്യമമാണ് ഇതുസംബന്ധിച്ച വിവരങ്ങൾ പുറത്തുവിട്ടത്.

ജാസ്മിൻ ഷായുടെ നേതൃത്വത്തിൽ മൂന്നരക്കോടിയുടെ തട്ടിപ്പ് നടത്തിയെന്ന പരാതിയില്‍ ക്രൈം ബ്രാഞ്ച് രണ്ട് തവണ പ്രാഥമികാന്വേഷണം നടത്തിയിരുന്നു. സംഘടനയുടെ അക്കൗണ്ടില്‍ നിന്നും 2017 ഏപ്രില്‍ മുതല്‍ 2019 ജനുവരി വരെയുള്ള കാലയളവില്‍ തട്ടിപ്പ് നടത്തിയതിന് തെളിവുണ്ടെന്നാണ് ക്രൈംബ്രാഞ്ച് റിപ്പോര്‍ട്ടില്‍ പറയുന്നത്.

വ്യാജരേഖയുണ്ടാക്കിയാണ് വിവിധ സ്ഥാപനങ്ങള്‍ക്കും വ്യക്തികള്‍ക്കും തുക കൈമാറിയത് . ഇത് ഈ വ്യക്തികള്‍ക്ക് ലാഭമുണ്ടാക്കാന്‍ വേണ്ടിയായിരുന്നു. വ്യാജരേഖ സംഘടനയില്‍ ഹാജരാക്കി വന്‍ സാമ്പത്തിക നഷ്ടമുണ്ടാക്കിയെന്നും എഫ്ഐആറിലുണ്ട്.

ജാസ്മിൻ ഷാ മൂന്നരക്കോടി രൂപയുടെ സാമ്പത്തിക കമക്കേട് നടത്തിയെന്നാരോപിച്ച് വൈസ് പ്രസിഡന്‍റ് സിബി സത്യൻ ഡിജിപിക്ക് നല്‍കിയ പരാതിയില്‍ കേസ് എടുത്ത് അന്വേഷിക്കാന്‍ ഉത്തരവായിരുന്നു. ഇതേത്തുടര്‍ന്നാണ് ക്രൈംബ്രാഞ്ച് നാലു പേര്‍ക്കെതിരെ കേസെടുത്തത്.

നഴ്‌സസ് അസോസിയേഷന്‍ ദേശീയപ്രസിഡന്‍റ് ജാസ്മിന്‍ ഷാ ആണ് കേസില്‍ ഒന്നാം പ്രതി. സംസ്ഥാന പ്രസിഡന്‍റ് ഷോബി ജോസഫ്, ഓഫീസ് ജീവനക്കാരന്‍ ജിത്തു, ഡ്രൈവര്‍ നിധിന്‍ മോഹന്‍ എന്നിവരാണ് കൂട്ടുപ്രതികൾ. വ്യാജരേഖ ചമയ്ക്കല്‍, വഞ്ചന തുടങ്ങിയ കുറ്റങ്ങളാണ് പ്രതികള്‍ക്കെതിരെ ചുമത്തിയിരിക്കുന്നത്.