മലപ്പുറത്ത് വീണ്ടും വൻ കുഴൽപ്പണ വേട്ട; പിടികൂടിയത് കോടിക്കണക്കിന് രൂപ; രണ്ടുപേർ കസ്റ്റഡിയിൽ

മലപ്പുറം: മലപ്പുറത്ത് വീണ്ടും വൻ കുഴൽപ്പണ വേട്ട(Cash Seized In Malappuram). കോടിക്കണക്കിന് രൂപയുടെ കുഴൽപ്പണമാണ് പിടിച്ചെടുത്തത്. കാറിൽ രഹസ്യ അറയുണ്ടാക്കിയായിരുന്നു ഒരു കോടി നാൽപ്പത്തിയഞ്ച് ലക്ഷം രൂപ കടത്താൻ ശ്രമിച്ചത്.

സംഭവത്തിൽ രണ്ട് പേരെ പോലീസ് കസ്റ്റഡിയിലെടുത്തു. തോപ്പുംപടി സ്വദേശികളായ രാജു, അനിൽ എന്നിവരാണ് പിടിയിലായത്. അതേസമയം മൂന്ന് ദിവസംകൊണ്ട് നാല് കോടി രൂപയാണ് മലപ്പുറത്ത് നിന്ന് പിടികൂടിയത്. കഴിഞ്ഞ ദിവസം വാളാഞ്ചേരിയിൽ വാഹനപരിശോധനയ്ക്കിടെ ദമ്പതികളിൽ നിന്ന് അനധികൃതമായി കടത്താൻ ശ്രമിച്ച പണം പിടികൂടിയിരുന്നു. കാറിൽ സീറ്റിനടിയിൽ ഒളിപ്പിച്ച നിലയിലാണ് പണം കടത്താൻ ശ്രമിച്ചത്.

ജില്ലാ പോലീസ് മേധാവി സുജിത്ത് ദാസിന് ലഭിച്ച രഹസ്യവിവരത്തെ തുടര്‍ന്നായിരുന്നു പരിശോധന. വളാഞ്ചേരി ജങ്ഷന് സമീപം കാത്തുനിന്ന് പോലീസ് സംഘം പണവുമായി എത്തിയ കാർ വളയുകയായിരുന്നു. കാറിൽ പരിശോധന നടത്തിയപ്പോഴാണ് സീറ്റിന് അടിയിൽ സൂക്ഷിച്ചിരുന്ന പണം കണ്ടെടുത്തത്. സംഭവത്തിൽ എറണാകുളത്ത് താമസിക്കുന്ന പൂണെ സ്വദേശികളായ ദമ്പതികളെയാണ് പോലീസ് പിടികൂടിയത്.