സൈബർ തട്ടിപ്പ് ! മുംബൈയിൽ ജില്ലാ ജഡ്ജിക്ക് നഷ്ടമായത് അമ്പതിനായിരം രൂപ ; തട്ടിപ്പിനുപയോഗിച്ചത്ഹൈക്കോടതി ജഡ്ജിയുടെ ഫോട്ടോ പ്രൊഫൈൽ പിക്ച്ചർ ആക്കിയ വാട്ട്സ്ആപ്പ് അക്കൗണ്ട്

മുംബൈ : സൈബർ തട്ടിപ്പിലൂടെ ജില്ലാ ജഡ്ജിയിൽ നിന്ന് അമ്പതിനായിരം രൂപ തട്ടിയെടുത്തതായി പരാതി. സംഭവത്തിൽ ഹൈക്കോടതി രജിസ്ട്രാറുടെ പരാതിയില്‍ ഐടി നിയമത്തിലെയും ഇന്ത്യന്‍ ശിക്ഷാനിയമത്തിലെയും വിവിധ വകുപ്പുകള്‍ പ്രകാരം മുംബൈ പോലീസ് കേസ് എടുത്തു. കഴിഞ്ഞ ദിവസമാണ് ഹൈക്കോടതി ജഡ്ജിയുടെ ചിത്രം വാട്‌സ് ആപ് പ്രൊഫൈൽ പിക്ച്ചറാക്കിയ വിരുതൻ ജില്ലാ ജഡ്ജിയുടെ കൈയില്‍ നിന്നും പണം തട്ടിയത്

ഹൈക്കോടതി ജഡ്ജിയുടെ ഫോട്ടോ പ്രൊഫൈൽ പിക്ച്ചർ ആക്കിയ അക്കൗണ്ടിൽ നിന്ന് ജില്ലാ ജഡ്ജിക്ക് ഒരു സന്ദേശം ലഭിക്കുകയായിരുന്നു. അടിയന്തരമായി അന്‍പതിനായിരം രൂപവേണമെന്നും വൈകുന്നേരം തന്നെ പണം മടക്കി തരാമെന്നുമായിരുന്നു സന്ദേശത്തിൽ പറഞ്ഞത്. ജില്ലാ ജഡ്ജിയും ഹൈക്കോടതി ജഡ്ജിയും നേരത്തെ പരിചയമുള്ളവരായതിനാല്‍ കൂടുതൽ ആലോചിക്കാതെ ജില്ലാ ജഡ്ജി അന്‍പതിനായിരം രൂപ അക്കൗണ്ടിലേക്ക് അയച്ചുകൊടുത്തു. കുറച്ച് കഴിഞ്ഞ് വീണ്ടും കുടുതല്‍ തുക ആവശ്യപ്പെട്ടപ്പോഴാണ് സംശയം തോന്നിയത്. തുടര്‍ന്ന് ജില്ലാ ജഡ്ജി ഹൈക്കോടതിയിലെ രജിസ്ട്രാര്‍ ഓഫീസുമായി ബന്ധപ്പെട്ടപ്പോഴാണ് തട്ടിപ്പിന് ഇരയായതായി ബോധ്യപ്പെട്ടത്.