തലസ്ഥാനത്ത് മയക്കുമരുന്നുമായി ഡാറ്റാ എഞ്ചിനീയർ പിടിയിൽ !കുടുങ്ങിയത് ടെക്നോപാർക്കിൽ ലഹരി വിതരണം ചെയ്തിരുന്ന കണ്ണിയെന്ന് വിവരം

കഴക്കൂട്ടം മൺവിളയിൽ മയക്കുമരുന്നുമായി ടെക്കി പിടിയിൽ. ടെക്നോപാർക്കിലെ ഒരു കമ്പനിയിൽ ഡാറ്റാ എഞ്ചിനീയറായി ജോലി നോക്കുന്ന മിഥുൻ മുരളിയാണ് 32 ​ഗ്രാം എംഡിഎംഎയും കഞ്ചാവുമായി പിടിയിലായത്. ടെക്കികൾക്ക് മയക്കുമരുന്ന് വിതരണം ചെയ്യുന്നയാളാണ് മുരുക്കുംപുഴ സ്വദേശിയായ മിഥുനെന്നാണ് വിവരം. ടെക്നോപാർക്കിനടുത്ത് വീട് വാടകയ്ക്കെടുത്താണ് ഇയാൾ താമസിക്കുന്നത്. എംഡിഎംഎയും കഞ്ചാവ് പൊതികളും 75,000 രൂപയും ഇയാളിൽനിന്ന് കണ്ടെടുത്തിട്ടുണ്ട്. ലഹരിവില്പനയിലൂടെ സമ്പാദിച്ച പണമാണിതെന്നാണ് റിപ്പോർട്ട്. ബെം​ഗളൂരുവിൽ നിന്നാണ് മിഥുൻ മയക്കുമരുന്ന് വാങ്ങുന്നത്. കഴക്കൂട്ടത്തെ ചില ഫ്ലാറ്റുകളിലും രഹസ്യകേന്ദ്രങ്ങളിലും ലഹരി ഇടപാടുകളും മയക്കുമരുന്ന് പാർട്ടികളും നടക്കുന്നതായി എക്സൈസിന് വിവരം ലഭിച്ചിരുന്നു.

മിഥുൻ വഴി ലഹരി ഇടപാട് നടക്കുന്നുണ്ടെന്ന് എക്സൈസ് നേരത്തെ മനസിലാക്കിയിരുന്നു. എന്നാൽ ഇയാളെ പിടികൂടാൻ കഴിഞ്ഞിരുന്നില്ല.ഇയാളുടെ ഇടപാടുകൾ എക്സൈസ് നിരീക്ഷിച്ചുവരികയായിരുന്നു. ഇതിന്റെ ഭാ​ഗമായി നടത്തിയ നീക്കത്തിലാണ് എംഡിഎംഎ കൈമാറ്റം ചെയ്യുന്നതിനിടെ ഇന്ന് ഇയാളെ പിടികൂടിയത്.