ശിവരാത്രി ദിവസം ഈശ യോഗാ സെന്ററിലെ ആഘോഷങ്ങളിൽ മുഖ്യാതിഥി പ്രതിരോധമന്ത്രി രാജ്‌നാഥ് സിംഗ്; ചടങ്ങിന് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ്, കേന്ദ്ര വാർത്താവിതരണ പ്രക്ഷേപണ സഹമന്ത്രി എൽ. മുരുകൻ തുടങ്ങി പ്രമുഖരുടെ വമ്പൻ നിര; തത്ത്വമയി നെറ്റ്‌വർക്കിൽ തത്സമയ സംപ്രേക്ഷണം

സദ്ഗുരുവിന്റെ നേതൃത്വത്തിൽ കോയമ്പത്തൂരിലെ ഈശ യോഗ സെന്ററിൽ നടക്കാനിരിക്കുന്ന 33-ാമത് മഹാശിവരാത്രി ആഘോഷങ്ങളിൽ കേന്ദ്ര പ്രതിരോധ മന്ത്രി രാജ്‌നാഥ് സിംഗ് മുഖ്യാതിഥിയായി പങ്കെടുക്കും. 2026 ഫെബ്രുവരി 15-ന് സംഘടിപ്പിക്കുന്ന ഈ ബൃഹത്തായ ചടങ്ങിൽ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ്, കേന്ദ്ര വാർത്താവിതരണ പ്രക്ഷേപണ സഹമന്ത്രി എൽ. മുരുകൻ തുടങ്ങി നിരവധി പ്രമുഖ നേതാക്കളും വിശിഷ്ടാതിഥികളായി എത്തും. ഭക്തിയും സംഗീതവും ധ്യാനവും സംഗമിക്കുന്ന ഈ രാത്രികാല ആഘോഷങ്ങൾ നൂറിലധികം ടെലിവിഷൻ ചാനലുകളിലൂടെയും ഡിജിറ്റൽ പ്ലാറ്റ്‌ഫോമുകളിലൂടെയും ലോകമെമ്പാടുമുള്ള 140 ദശലക്ഷത്തിലധികം ആളുകളിലേക്ക് തത്സമയം എത്തിക്കാനാണ് ലക്ഷ്യമിടുന്നത്. മൊത്തം 23 ഇന്ത്യൻ ഭാഷകളിലും വിദേശ ഭാഷകളിലും പരിപാടിയുടെ തത്സമയ സംപ്രേഷണം ലഭ്യമായിരിക്കും. തത്ത്വമയി നെറ്റു വർക്കിലും ശിവരാത്രി വൈകുന്നേരം മുതൽ അടുത്ത ദിവസം രാവിലെ വരെ 12 ദിവസം നീളുന്ന മുഴുനീള ലൈവ് ഉണ്ടായിരിക്കുന്നതാണ്.

ധ്യാനലിംഗത്തിൽ നടക്കുന്ന ‘പഞ്ചഭൂത ക്രിയ’ എന്ന ശുദ്ധീകരണ ആചാരത്തോടെയാണ് ആഘോഷങ്ങൾക്ക് തുടക്കമാകുന്നത്. പ്രപഞ്ചത്തിലെ അഞ്ച് മൂലകങ്ങളെ ആദരിക്കുന്ന ഈ ചടങ്ങിന് പിന്നാലെ സ്ത്രീദൈവികതയെ ആഘോഷിക്കുന്ന ‘ലിംഗഭൈരവി മഹായാത്ര’ എന്ന പ്രൗഢഗംഭീരമായ ഘോഷയാത്രയും അരങ്ങേറും. ആധുനികതയും പാരമ്പര്യവും കോർത്തിണക്കിയുള്ള വൈവിധ്യമാർന്ന സംഗീത പരിപാടികളാണ് രാത്രിയെ ധന്യമാക്കുക. പ്രശസ്ത ഗായകൻ ആദിത്യ ഗാധ്വിയുടെ ഗുജറാത്തി നാടൻ പാട്ടുകളും പ്രശാന്ത് സോനാഗ്രയും സംഘവും അവതരിപ്പിക്കുന്ന നാടൻ ചെണ്ടമേളങ്ങളും ആഘോഷങ്ങൾക്ക് മാറ്റുകൂട്ടും.

ഈശയുടെ തനത് സംഗീത സംഘമായ ‘സൗണ്ട്സ് ഓഫ് ഈശ’യോടൊപ്പം സ്വരൂപ് ഖാൻ, ബ്ലെയ്‌സ് (Blaaze), പാരഡോക്സ് തുടങ്ങിയ പ്രമുഖ കലാകാരന്മാരും വേദിയിലെത്തും. സ്വാഗത് റാത്തോഡ്, പൃഥ്വി ഗന്ധർവ് എന്നിവർ ചേർന്ന് നാടൻ കലകളും സമകാലിക സംഗീതവും ചേർത്തൊരുക്കുന്ന വേറിട്ട പ്രകടനങ്ങളും രാത്രിയിലുടനീളം ഉണ്ടാകും. ആത്മീയതയും കലയും ഒത്തുചേരുന്ന ഈ മഹാശിവരാത്രി സംഗമം ലോകത്തിലെ തന്നെ ഏറ്റവും വലിയ ആത്മീയ കൂട്ടായ്മകളിൽ ഒന്നായിട്ടാണ് കണക്കാക്കപ്പെടുന്നത്.