2025 ലെ ആദ്യ നിയമസഭാ തെരഞ്ഞെടുപ്പിന്റെ പരസ്യപ്രചാരണം ഇന്ന് അവസാനിക്കും; ദില്ലി മറ്റെന്നാൾ പോളിംഗ് ബൂത്തിലേക്ക്; പ്രതീക്ഷയിൽ പ്രധാന പാർട്ടികൾ

ദില്ലി: 2025 ലെ ആദ്യ നിയമസഭാ തെരഞ്ഞെടുപ്പിന്റെ പരസ്യപ്രചാരണം ഇന്ന് അവസാനിക്കും. ദില്ലിയിൽ മറ്റെന്നാൾ വോട്ടെടുപ്പ് നടക്കും. 70 അംഗ നിയമസഭയിലേയ്ക്ക് ഒറ്റഘട്ടമായിട്ടാണ് തെരഞ്ഞെടുപ്പ് നടക്കുക. വാശിയേറിയ തെരഞ്ഞെടുപ്പ് പ്രചാരണമാണ് നടന്നത്. ഭരണകക്ഷിയായ ആം ആദ്‌മി പാർട്ടിയും ബിജെപിയും തമ്മിലാണ് പ്രധാനമത്സരം. കഴിഞ്ഞ തെരഞ്ഞെടുപ്പിൽ ഒരു സീറ്റിലും വിജയിക്കാൻ കഴിയാത്ത കോൺഗ്രസ് ഇത്തവണ അക്കൗണ്ട് തുറക്കാനുള്ള ശ്രമത്തിലാണ്.

തെരഞ്ഞെടുപ്പിനായുള്ള ഒരുക്കങ്ങൾ പൂർത്തിയായിക്കഴിഞ്ഞു. പോളിംഗ് ആരംഭിച്ച് പൂർണമായും അവസാനിക്കുന്നത് വരെ എക്സിറ്റ് പോൾ ഫലപ്രഖ്യാപനം തെരഞ്ഞെടുപ്പ് കമ്മീഷൻ നിരോധിച്ചു. 2015 ലും 2020 ലും നടന്ന നിയമസഭാ തെരഞ്ഞെടുപ്പുകളിൽ ദില്ലി തൂത്തുവാരിയത് ആം ആദ്‌മി പാർട്ടിയാണ്. കഴിഞ്ഞ തെരഞ്ഞെടുപ്പിൽ 62 സീറ്റുകളിൽ വിജയിച്ചത് ആം ആദ്‌മി പാർട്ടിയാണ് 8 സീറ്റുകൾ ബിജെപിയ്ക്ക് ലഭിച്ചപ്പോൾ കോൺഗ്രസിന് സീറ്റൊന്നും ലഭിച്ചില്ല.

ഭരണത്തുടർച്ചയ്ക്കായി ആം ആദ്‌മി പാർട്ടി ശ്രമിക്കുമ്പോൾ എങ്ങനെയും ദില്ലിയുടെ അധികാരം പിടിക്കാനാണ് ബിജെപിയുടെ ശ്രമം. 1998 ന് ശേഷം ബിജെപിയ്ക്ക് ഭരണം പിടിക്കാൻ സാധിക്കാത്ത ഏക ഉത്തരേന്ത്യൻ സംസ്ഥാനമാണ് ദില്ലി. മദ്യനയ അഴിമതി ഉൾപ്പെടെയുള്ള അഴിമതിയാരോപണങ്ങളിൽ കുരുങ്ങി നിൽക്കുന്ന ആം ആദ്‌മി പാർട്ടിക്ക് നിലവിൽ കഴിഞ്ഞ കാലങ്ങളിലെ ജനപിന്തുണയില്ല. ഈ അവസരം പ്രയോജനപ്പെടുത്തുകയാണ് ബിജെപിയുടെ ലക്‌ഷ്യം. സീറ്റുകൾ ഒന്നുമില്ലാത്ത അവസ്ഥ ഒഴിവാക്കാനാണ് കോൺഗ്രസിന്റെ ശ്രമം.