തെരഞ്ഞെടുപ്പ് പ്രചാരണം കൊഴുക്കുന്നതിനിടയിൽ കെജ്‌രിവാളിന്റെ വീട്ടിൽ മാലിന്യം തള്ളി മുൻ സുഹൃത്ത് സ്വാതി മലിവാൾ; പ്രതിഷേധിച്ചത് 3 ലോഡ് മാലിന്യം വിതറി; നാണംകെട്ട് ആംആദ്‌മി പാർട്ടി

ദില്ലി: സംസ്ഥാനം നേരിടുന്ന മാലിന്യ പ്രശ്‌നത്തിൽ പ്രതിഷേധിച്ച് കെജ്‌രിവാളിന്റെ വീട്ടിൽ മാലിന്യം തള്ളി പ്രതിഷേധം. രാജ്യസഭാ എം പി സ്വാതി മലിവാളാണ് പ്രതിഷേധത്തിന് നേതൃത്വം നൽകിയത്. വളരെക്കാലം അരവിന്ദ് കെജ്‌രിവാളിന്റെ സഹപ്രവർത്തകയായിരുന്നു ആം ആദ്‌മി പാർട്ടിയുടെ തന്നെ എം പിയായ സ്വാതി. ദില്ലിയിലെ വിവിധ പ്രദേശങ്ങളിൽ നിന്ന് ശേഖരിച്ച മൂന്നു ലോഡ് മാലിന്യമാണ് മുൻ മുഖ്യമന്ത്രിയുടെ വീട്ടിൽ കൊണ്ടുപോയി തള്ളിയത്. സംസ്ഥാനം മുഴുവൻ മാലിന്യക്കൂമ്പാരമാണെന്ന് ആരോപിച്ചുകൊണ്ടാണ് സ്വാതിയുടെ നേതൃത്വത്തിൽ സ്ത്രീകൾ പ്രതിഷേധം നടത്തിയത്.

മാലിന്യം കൊണ്ടുവന്ന മൂന്നു ട്രക്കുകളിൽ ഒന്നിലാണ് സ്വാതി മലിവാൾ എത്തിയത്. തുടർന്ന് വീടിന് മുന്നിൽ മാലിന്യം വിതറിയ സ്വാതിയെ പോലീസ് കസ്റ്റഡിയിലെടുത്തു. ദില്ലിയെ കെജ്‌രിവാൾ ഒരു മാലിന്യ കൂമ്പാരമാക്കിയെന്നും സംസ്ഥാനത്ത് എവിടെനോക്കിയാലും മാലിന്യമാണെന്നും സ്വാതി മലിവാൾ ആരോപിച്ചു. ജനങ്ങൾ പലതരത്തിലുള്ള ബുദ്ധിമുട്ടുകൾ ഇതുകാരണം അനുഭവിക്കുന്നു എന്നാൽ സർക്കാർ ഇക്കാര്യത്തിൽ നോക്കുകുത്തി മാത്രമാകുന്നുവെന്നും അവർ കൂട്ടിച്ചേർത്തു.
.
ജനങ്ങൾ അനുഭവിക്കുന്ന ബുദ്ധിമുട്ടുകൾ അദ്ദേഹവും അറിയട്ടെ എന്ന ലക്ഷ്യത്തോടെയാണ് വീടിന് മുന്നിൽ മാലിന്യം തള്ളിയത്. അങ്ങനെയെങ്കിലും ജനങ്ങൾക്ക് വേണ്ടി പ്രവർത്തിക്കാൻ ബോധമുണ്ടാകട്ടെ. ദില്ലിയിലെ ജനങ്ങൾക്ക് വേണ്ടിയാണ് പ്രതിഷേധം നടത്തിയതെന്നും പോലീസിനെയും കെജ്‌രിവാളിന്റെ ഗുണ്ടകളെയും തനിക്ക് ഭയമില്ലെന്നും സ്വാതി മലിവാൾ കൂട്ടിച്ചേർത്തു.