ബാലരാമപുരം കൊലപാതകം: ശ്രീതുവും ഹരികുമാറും തമ്മിൽ നടത്തിയത് സഹോദരി സഹോദര ബന്ധത്തിനപ്പുറത്തെ വാട്ട്സ് ആപ്പ് ചാറ്റുകൾ ? രണ്ടുവയസുകാരി ദേവേന്ദുവിന്റെ മൃതദേഹം സംസ്കരിച്ചു

തിരുവനന്തപുരം: ബാലരാമപുരത്ത് ക്രൂരമായ കൊലപാതകത്തിന് ഇരയായ രണ്ടുവയസുകാരി ദേവേന്ദുവിന്റെ മൃതദേഹം സംസ്‌കരിച്ചു. മതപരമായ ചടങ്ങുകൾ ഒന്നുമില്ലാതെയായിരുന്നു സംസ്‌കാരം. ബന്ധുവിന്റെ വീട്ടുവളപ്പിലാണ് കുഞ്ഞിന്റെ മൃതദേഹം സംസ്‌കരിച്ചത്. രാവിലെ മുതൽ പോലീസ് കസ്റ്റഡിയിലായിരുന്ന കുടുംബാംഗങ്ങളിൽ കുട്ടിയുടെ അച്ഛനെയും മുത്തശ്ശിയേയും വിട്ടയച്ചു. അവർ വീട്ടിലെത്തി സംസ്‌കാരത്തിന് മുന്നേ കുഞ്ഞിനെ ഒരു നോക്ക് കണ്ടു. അമ്മയും അമ്മാവനും പോലീസ് കസ്റ്റഡിയിൽ തുടരുകയാണ്.

ദേവേന്ദുവിന്റേത് മുങ്ങിമരണമാണെന്നാണ് പോസ്റ്റുമോർട്ടം റിപ്പോർട്ട്. കുഞ്ഞിനെ കിണറ്റിലെറിഞ്ഞു കൊന്നത് താനാണെന്ന് അമ്മാവൻ ഹരികുമാർ പോലീസിനോട് സമ്മതിച്ചിട്ടുണ്ട്. പോലീസ് എന്നാൽ ഇത് വിശ്വസിച്ചിട്ടില്ല. കുട്ടിയുടെ അമ്മ ശ്രീതുവിനെ രക്ഷിക്കാനാണോ ഹരികുമാർ കുറ്റം സമ്മതിച്ചത് എന്ന സംശയം പോലീസിനുണ്ട്. ശ്രീതുവിന്റെയും ഹരികുമാറിന്റെയും മൊഴികളിൽ വൈരുധ്യമുള്ളതിനാൽ ചോദ്യം ചെയ്യൽ തുടരുകയാണ്.

കുട്ടിയുടെ അമ്മ ശ്രീതുവും ശ്രീജിത്തും തമ്മിൽ നല്ലബന്ധത്തിൽ ആയിരുന്നില്ല എന്ന വിവരമുണ്ട്. കഴിഞ്ഞ രണ്ടുമാസമായി ശ്രീജിത്ത് വീട്ടിലേയ്ക്ക് എത്തിയിരുന്നില്ല. മുത്തച്ഛന്റെ മരണശേഷം 16 ദിവസം തികയുന്ന ചടങ്ങുകൾക്കായാണ് ശ്രീജിത്ത് ഇന്നലെ വീട്ടിലെത്തിയത്. ശ്രീതു ദേവസ്വം ബോർഡ് ജീവനക്കാരിയാണെന്നും ലക്ഷങ്ങളുടെ കടബാധ്യത അവർക്കുണ്ടെന്നും നാട്ടുകാർ പറയുന്നു. ഇന്നലെ രാത്രി ശ്രീതുവും ഹരികുമാറും തമ്മിൽ ദീർഘനേരം വാട്ട്സ് ആപ്പിൽ ചാറ്റ് ചെയ്‌തിരുന്നു. സഹോദരി സഹോദര ബന്ധത്തിനപ്പുറമുള്ള ചാറ്റുകളാണ് പോലീസിന് ലഭിച്ചത്.

ഇന്ന് പുലർച്ചെ അഞ്ചു മണിയോടെയാണ് കുട്ടിയെ കാണാനില്ലെന്ന പരാതി ലഭിക്കുന്നത്. പോലീസ് നടത്തിയ തെരച്ചിലിലാണ് കുഞ്ഞിന്റെ മൃതദേഹം കിണറ്റിൽ നിന്ന് കണ്ടെത്തിയത്. കുഞ്ഞ് തനിയെ കിണറ്റിൽ വീഴാൻ സാധ്യതയില്ലെന്ന പോലീസ് നിഗമനമാണ് അന്വേഷണം വീട്ടുകാരിലേയ്ക്ക് എത്തിച്ചത്.