മൂടൽ മഞ്ഞിൽ മറഞ്ഞ് ദില്ലി ; ഉത്തരേന്ത്യയിൽ അതിശൈത്യം തുടരുന്നു, വ്യോമ-റെയിൽ ഗതാഗതങ്ങൾക്ക് തടസ്സം

ദില്ലി: മഞ്ഞിൽ മരവിച്ച് ദില്ലി. മൂടൽ മഞ്ഞ് കനക്കുന്നു. ദില്ലിയിൽ ഇതുവരെ കുറഞ്ഞ താപനില 1.9 ഡിഗ്രി സെൽഷ്യസ് രേഖപ്പെടുത്തി. കനത്ത മൂടൽമഞ്ഞ് കാരണം ദില്ലിയിൽ വിമാനത്താവളത്തിൽ 20 വിമാനങ്ങളുടെ സര്‍വീസ് വൈകി. ഉത്തരേന്ത്യയിൽ 42 തീവണ്ടികളാണ് വൈകി ഓടുന്നത്. പലയിടങ്ങളിലും കാഴ്ചാ പരിധി കുറഞ്ഞു വരികയാണ്. 1.5 ഡിഗ്രി സെൽഷ്യസ് താപനിലയാണ് ദില്ലിയിലെ ഉയര്‍ന്ന മേഖലകളിൽ രേഖപ്പെടുത്തിയിരിക്കുന്നത്. പലയിടങ്ങളിലും കനത്ത മൂടൽ മഞ്ഞ് കാരണം കാഴ്ചാ പരിധി 25 മീറ്റർ വരെയായി ചുരുങ്ങി.

പല ഉത്തരേന്ത്യൻ സംസ്ഥാനങ്ങളിലും സ്ഥിതി രൂക്ഷമായിവരുകയാണ്. ദില്ലി, ഹരിയാന, ചണ്ഡീഗഡ്, കിഴക്കൻ ഉത്തർ പ്രദേശ്, കിഴക്കൻ രാജസ്ഥാൻ, മധ്യപ്രദേശ്, എന്നിവിടങ്ങളിൽ അതിശൈത്യം തുടരുമെന്നാണ് മുന്നറിയിപ്പ്..ജനങ്ങളെ ഇത് നല്ല രീതിയിൽ തന്നെ ബാധിച്ചിട്ടുണ്ട്.