നേതാവിന്റെ ചെയ്തികൾക്കെതിരെ ശബ്ദമുയയർത്തി; ജനറൽ സെക്രട്ടറി സ്ഥാനത്ത് നിന്നും ലത്തീഫ് തുറയൂരിനെ നീക്കി എംഎസ്എഫ്

കോഴിക്കോട്: എംഎസ്എഫ് (MSF) സംസ്ഥാന ജനറൽ സെക്രട്ടറി ലത്തീഫ് തുറയൂരിനെ സ്ഥാനത്ത് നിന്നും നീക്കി എംഎസ്എഫ്. നിലവിലെ എംഎസ്എഫ് സംസ്ഥാന സെക്രട്ടറിമാരിലൊരാളായ ആബിദ് ആറങ്ങാടിക്കാണ് പകരം ചുമതല നല്‍കിയിരിക്കുന്നത്. എം കെ മുനീറിന്‍റെ നേതൃത്വത്തിലുള്ള പാർട്ടി അന്വേഷണ സമിതി റിപ്പോർട്ടിന്‍റെ ​അടിസ്ഥാനത്തിലാണ് അച്ചടക്ക നടപടിയെന്നാണ് വിവരം.

ഹരിത വിഷയത്തിൽ പി കെ നവാസ് വിരുദ്ധ പക്ഷത്തായിരുന്നു ലത്തീഫ് തുറയൂർ. പി കെ നവാസിനും കൂട്ടര്‍ക്കുമെതിരെ ശക്തമായ നിലപാട് എടുക്കുകയും ചിലരുടെ പ്രവൃത്തി എംഎസ്എഫിന് നാണക്കേടായെന്ന് തുറന്നടിക്കുകയും ചെയ്തിരുന്നു. ഇതിനുപിന്നാലെയാണ് ഇയാളെ പുറത്താക്കിക്കൊണ്ടുള്ള നടപടി ഉണ്ടായിരിക്കുന്നത്.

അതേസമയം ഹരിത വിഭാഗവും എം.എസ്.എഫും തമ്മിലുടലെടുത്ത വിവാദത്തിന് ശേഷം നിലവില്‍ വന്ന പുതിയ കമ്മിറ്റിയിലെ ജനറല്‍ സെക്രട്ടറിയും പ്രസിഡന്റും തമ്മില്‍ ഏകോപനമില്ല എന്ന പരാതി ലീഗ് നേതൃത്വത്തിന് മുന്നില്‍ എത്തിയിരുന്നു. രണ്ടുപേരും രണ്ടുവഴിക്കാണ് സംഘടനയെ മുന്നോട്ട് കൊണ്ടുപോകുന്നതെന്നും എം.എഫ്.എസിനകത്ത് വിഭാഗീയതയുണ്ട് എന്നും ആരോപണം ഉയര്‍ന്നിരുന്നു. തുടര്‍ന്നാണ് ഈ പരാതി അന്വേഷിക്കാന്‍ എം.കെ മുനീറിന്റെ നേതൃത്വത്തില്‍ ഒരു സമിതിയെ കൊണ്ടുവന്നത്.