‘കാര്‍ട്ടൂണ്‍ നെറ്റ്‌വര്‍ക്ക് നിർത്തുന്നു’; വാർത്ത വ്യാജം; സത്യം വെളിപ്പെടുത്തി വാര്‍ണര്‍ബ്രോസ് ഡിസ്‌കവറി

കാർട്ടൂൺ കണ്ടുവളർന്നവരാണ് നമ്മളെല്ലാവരും. അതിൽ ഏറ്റവും പ്രിയപ്പെട്ട ഒരു ചാനൽ ആണ് കാര്‍ട്ടൂണ്‍ നെറ്റ്‌വര്‍ക്ക്. 90’s കിഡ്‌സിന്റെ ഗൃഹാതുരതയുടെ ഭാഗം കൂടിയാണിത്. എന്നാൽ ഇന്നാകെ മുതൽ കാര്‍ട്ടൂണ്‍ നെറ്റ്‌വര്‍ക്ക് ചാനല്‍ ഉടന്‍ നിര്‍ത്തുമെന്ന തരത്തില്‍ നിരവധി വാർത്തകൾ പ്രചരിച്ചിരുന്നു. ഇത് തികച്ചും തെറ്റാണ്. സത്യാവസ്ഥ അറിയാതെയാണ് പലരും ഈ വാർത്ത ഷെയർ ചെയ്തത്. വാര്‍ണര്‍ ബ്രോസ്, ഡിസ്‌കവറി ലയനത്തിന് പിന്നാലെ ആനിമേഷന്‍, സ്‌ക്രിപ്റ്റിംഗ് ഡിവിഷനുകളില്‍ നിന്ന് ഉള്‍പ്പെടെ നിരവധി ജീവനക്കാരെ പിരിച്ചുവിട്ടിരുന്നു. ഈ സാഹചര്യമാണ് ഇത്തരമൊരു അഭ്യൂഹം പരക്കാൻ കാരണമായത്.

കാര്‍ട്ടൂണ്‍ നെറ്റ്‌വര്‍ക്ക് നിര്‍ത്തുകയാണെന്ന വാര്‍ത്ത അടിസ്ഥാന രഹിതമാണെന്ന് വാര്‍ണര്‍ബ്രോസ് ഡിസ്‌കവറി അറിയിച്ചു. ജീവനക്കാരെ ചിലരെ പിരിച്ചുവിട്ടെന്ന വാര്‍ത്ത കമ്പനി സ്ഥിരീകരിച്ചെങ്കിലും അത് ചാനലിനെ ബാധിക്കില്ല. ചാനല്‍ ഇനിയും ലഭ്യമാകുമെന്നും കമ്പനി വ്യക്തത വരുത്തി.

വാർത്ത പ്രചരിച്ചതോടെ നിരവധി പേർ സമൂഹമാധ്യമങ്ങളില്‍ തങ്ങളുടെ വൈകാരിക നിമിഷം പങ്കുവച്ചു. ബാല്യകാലത്തെ വര്‍ണാഭമാക്കിയ നിരവധി ക്ലാസിക്കുകള്‍ സമ്മാനിച്ച കാര്‍ട്ടൂണ്‍ നെറ്റ്‌വര്‍ക്ക് നിര്‍ത്തുന്നത് വിഷമമുണ്ടാക്കുന്ന വാര്‍ത്തയാണെന്ന് നിരവധി പേര്‍ പറഞ്ഞു. എന്നാല്‍ തെറ്റായ വാര്‍ത്ത പ്രചരിപ്പിക്കുന്നത് നല്ലതല്ലെന്ന് ചൂണ്ടിക്കാട്ടിയും ചില പോസ്റ്റുകളും ട്വീറ്റുകളും ഇപ്പോൾ പുറത്ത് വരുന്നുണ്ട്.