തർക്കം പരിഹരിച്ചു ! കാന്താര-2 കേരളത്തിൽ പ്രദർശിപ്പിക്കും; സ്ഥിരീകരണവുമായി ഫിയോക്ക്

കൊച്ചി : ഋഷഭ് ഷെട്ടി രചനയും സംവിധാനവും നിർവഹിച്ച് ഹോംബാലെ ഫിലിംസ് നിർമ്മിച്ച ‘കാന്താര: എ ലെജൻഡ് – ചാപ്റ്റർ 1’ എന്ന ചിത്രം കേരളത്തിലെ തിയേറ്ററുകളിൽ പ്രദർശിപ്പിക്കും. വിതരണക്കാരുമായി നിലനിന്നിരുന്ന തർക്കം പരിഹരിച്ചതായി തിയേറ്റർ ഉടമകളുടെ സംഘടനയായ ഫിയോക്ക് (FEUOK) അറിയിച്ചു. ഒക്ടോബർ രണ്ടിനാണ് ചിത്രം റിലീസ് ചെയ്യുന്നത്.

തിയേറ്റർ കളക്ഷന്റെ 50 ശതമാനം വിതരണക്കാർക്ക് നൽകാൻ ധാരണയായി. ചിത്രത്തിന്റെ കേരളത്തിലെ വിതരണം ഏറ്റെടുത്തിരിക്കുന്നത് പൃഥ്വിരാജ് പ്രൊഡക്ഷൻസും മാജിക് ഫ്രെയിംസും ചേർന്നാണ്. സിനിമയുടെ നെറ്റ് കളക്ഷന്റെ 55% വരുമാനം രണ്ട് ആഴ്ചത്തേക്ക് വേണമെന്നാണ് മാജിക് ഫ്രെയിംസ് ആവശ്യപ്പെട്ടത്, ഇതാണ് തർക്കത്തിന് വഴിവെച്ചത്. എന്നാൽ, ഫിയോക്ക് ഒരു ആഴ്ചത്തേക്കാണ് ഇതിന് അനുമതി നൽകിയിരുന്നത്. ഇരു കൂട്ടരും തങ്ങളുടെ നിലപാടുകളിൽ ഉറച്ചുനിന്നതോടെയാണ് പ്രശ്നം വഷളായത്. തുടർന്ന് നടന്ന ചർച്ചകൾക്കൊടുവിൽ വിതരണക്കാരുടെ ആവശ്യം ഭാഗികമായി അംഗീകരിക്കുകയായിരുന്നു.

2022-ൽ പുറത്തിറങ്ങിയ ‘കാന്താര’ വൻ ബോക്സ് ഓഫീസ് വിജയമായിരുന്നു. ‘കെജിഎഫ്’, ‘സലാർ’ തുടങ്ങിയ സൂപ്പർഹിറ്റ് ചിത്രങ്ങൾ നിർമ്മിച്ച ഹോംബാലെ ഫിലിംസ് തന്നെയാണ് ‘ചാപ്റ്റർ 1’-ന്റെയും നിർമ്മാതാക്കൾ. മലയാളത്തിൽ പൃഥ്വിരാജ് പ്രൊഡക്ഷൻസും മാജിക് ഫ്രെയിംസും ചേർന്നാണ് ചിത്രം വിതരണം ചെയ്യുന്നത്.