ഇസ്രായേലിന്റെ നിലനിൽപ്പിനുള്ള അവകാശം അംഗീകരിക്കുന്നുവോ ? എങ്കിൽ മാത്രം പൗരത്വം !പൗരത്വത്തിനായി അപേക്ഷിക്കുന്നവർക്കായി പുതിയ മാനദണ്ഡങ്ങൾ മുന്നോട്ട് വച്ച് ജർമ്മനി

പൗരത്വത്തിനായി അപേക്ഷിക്കുന്നവർ ഇസ്രായേലിന്റെ നിലനിൽപ്പിനുള്ള അവകാശം അംഗീകരിക്കുന്നുവെന്നും ഇസ്രായേൽ രാജ്യത്തിന്റെ നിലനിൽപ്പിനെതിരായ ഏത് ശ്രമങ്ങളെയും അപലപിക്കുന്നുവെന്നും ഔദ്യോഗികമായി അംഗീകരിക്കണമെന്ന് കിഴക്കൻ ജർമ്മനിയിലെ സംസ്ഥാനമായ സാക്സോണി-അൻഹാൾട്ട്.

സംസ്ഥാന, ഫെഡറൽ ആഭ്യന്തര മന്ത്രിമാരുടെ യോഗത്തിന് മുന്നോടിയായി ഇന്നലെ മാദ്ധ്യമങ്ങളോട് സംസാരിച്ച സാക്‌സോണി-അൻഹാൾട്ട് ആഭ്യന്തര മന്ത്രി ടമര സീസ്‌ഷാങ് ജർമ്മനിയിലെ മറ്റ് 15 സംസ്ഥാനങ്ങളോട് സമാനമായ നിയമങ്ങൾ സ്വീകരിക്കാൻ ആവശ്യപ്പെട്ടതായി വെളിപ്പെടുത്തി.
കഴിഞ്ഞ മാസംഅവസാനത്തോടെഇക്കാര്യത്തിൽ എല്ലാ സാക്‌സണി-അൻഹാൾട്ട് മുനിസിപ്പാലിറ്റികൾക്കും മന്ത്രാലയം ഉത്തരവ് അയച്ചതായി സീഷാങ് പറഞ്ഞു. പൗരത്വത്തിനായി അപേക്ഷിക്കുന്നയാൾ യഹൂദവിരുദ്ധ മനോഭാവം പ്രകടിപ്പിക്കുന്നുണ്ടോ എന്ന് സൂക്ഷ്മമായി നിരീക്ഷിക്കാൻ അധികാരികൾക്ക് നിർദ്ദേശം നൽകുകയും ചെയ്തിട്ടുണ്ട്. ഡിക്ലറേഷനിൽ ഒപ്പിടാൻ വിസമ്മതിച്ചാൽ അപേക്ഷകന്റെ അഭ്യർത്ഥന നിരസിക്കാൻ പ്രാദേശിക അധികാരികൾക്ക് നിർദ്ദേശം നൽകിയിട്ടുണ്ട്.

രണ്ടാം ലോകമഹായുദ്ധസമയത്ത് ജർമ്മനിയിലെ അന്നത്തെ നാസി സർക്കാർ 6 ദശലക്ഷത്തിലധികം യൂറോപ്യൻ ജൂതന്മാരെ കൊലപ്പെടുത്തിയ ശേഷം ജൂതന്മാരെ സംരക്ഷിക്കാനുള്ള ചരിത്രപരമായ ഉത്തരവാദിത്തം തങ്ങൾക്കാണെന്ന് അവകാശപ്പെടുകയാണ് ജർമ്മനി.