ജാമ്യത്തിലിറങ്ങി വീണ്ടും ലഹരി കച്ചവടം; റിസോർട്ട് ഉടമ എംഡിഎംഎയും കഞ്ചാവുമായി പിടിയിൽ

കൽപ്പറ്റ: മാരക ലഹരിമരുന്നായ എംഡിഎംഎയുമായി മുൻപ് പിടിയിലായി ജാമ്യത്തിൽ കഴിയുകയായിരുന്ന റിസോർട്ട് നടത്തിപ്പുകാരൻ വീണ്ടും ലഹരിമരുന്നിനൊപ്പം പിടിയിലായി. അമ്പിലേരി റീമാ കോട്ടേജിൽ കെ. ഷൈജൽ (43) ആണ് ജില്ലാ ലഹരി വിരുദ്ധ സ്ക്വാഡിന്റെയും കൽപ്പറ്റ പോലീസിന്റെയും സംയുക്ത പരിശോധനയിൽ കുടുങ്ങിയത്. ഷൈജൽ ഏറ്റെടുത്ത് നടത്തുന്ന പുഴമുടിയിലെ ‘ഫ്രീബേഡ്’ റിസോർട്ടിൽ നിന്നാണ് ഇയാളെ പിടികൂടിയത്.

പോലീസിന്റെ മിന്നൽ പരിശോധനയിൽ ഇയാളുടെ വസ്ത്രത്തിന്റെ പോക്കറ്റിൽ ഒളിപ്പിച്ച നിലയിൽ 0.62 ഗ്രാം എംഡിഎംഎ കണ്ടെടുത്തു. ഇതിനു പുറമെ 6.63 ഗ്രാം കഞ്ചാവും ലഹരിമരുന്ന് വിൽപനയിലൂടെ ലഭിച്ചതെന്ന് കരുതുന്ന അര ലക്ഷത്തോളം രൂപയും പോലീസ് സംഘം ഇയാളിൽ നിന്ന് പിടിച്ചെടുത്തിട്ടുണ്ട്. എസ്.ഐമാരായ വിമൽ ചന്ദ്രൻ, സജി ഷിനോബ്, എ.എസ്.ഐ ജിജി മോൾ, സീനിയർ സിവിൽ പോലീസ് ഓഫീസർ അരുൺ രാജ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.

അത്യന്തം ഗൗരവകരമായ പശ്ചാത്തലമാണ് പ്രതിയായ ഷൈജലിനുള്ളത്. 2025 ജൂണിൽ വാണിജ്യ അളവിലുള്ള (Commercial Quantity) എംഡിഎംഎയുമായി ഇയാൾ പിടിയിലായിരുന്നു. അന്ന് കർണാടകയിൽ നിന്ന് കേരളത്തിലേക്ക് കാറിൽ കടത്താൻ ശ്രമിച്ച 76.44 ഗ്രാം എംഡിഎംഎയുമായാണ് ഷൈജലും കൂട്ടാളിയും അറസ്റ്റിലായത്. ഈ കേസിൽ ജാമ്യത്തിലിറങ്ങി നിൽക്കവെയാണ് വീണ്ടും ലഹരിമരുന്ന് വിൽപനയുമായി ഇയാൾ പോലീസിന്റെ വലയിലാകുന്നത്.