താൻ മതസ്പര്‍ദ്ദ വളര്‍ത്തുന്ന രീതിയില്‍ പ്രവര്‍ത്തിക്കുന്ന ആളാണെന്ന് ചിത്രീകരിക്കാന്‍ ശ്രമിച്ചു ! കാഫിർ സ്‌ക്രീൻ ഷോട്ട് വിവാദത്തിൽ ലീഗ് നേതാവ് പാറക്കൽ അബ്ദുള്ളയ്ക്ക് വക്കീൽ നോട്ടീസ് അയച്ച് ഡിവൈഎഫ്ഐ നേതാവ് റിബേഷ് രാമകൃഷ്ണൻ

ലോക്‌സഭാ തെരഞ്ഞെടുപ്പ് കാലത്ത് വടകരയിൽ വൻ കോളിളക്കമുണ്ടാക്കിയ ‘കാഫിർ’ സ്ക്രീൻ ഷോട്ട് വിവാദത്തിൽ മുസ്ലിം ലീഗ് നേതാവ് പാറക്കൽ അബ്ദുള്ളക്ക് ഡിവൈഎഫ്ഐ നേതാവ് റിബേഷ് രാമകൃഷ്ണൻ വക്കീൽ നോട്ടീസ് അയച്ചു. തനിക്കെതിരെ പ്രചാരണം നടത്തി സമൂഹത്തിൽ വേർതിരിവ് ഉണ്ടാക്കാൻ ശ്രമിച്ചെന്നാണ് റിബേഷ് ആരോപിക്കുന്നത്. പാറക്കൽ അബ്ദുള്ള തന്നോട് മൂന്ന് ദിവസത്തിനുള്ളിൽ പരസ്യമായി ഖേദം പ്രകടിപ്പിക്കണമെന്നും അല്ലാത്ത പക്ഷം നിയമനടപടികളുമായി മുന്നോട്ടു പോകുമെന്നും റിബേഷ് നോട്ടീസിൽ വ്യക്തമാക്കുന്നു.

“താന്‍ മതസ്പര്‍ദ്ദ വളര്‍ത്തുന്ന രീതിയില്‍ പ്രവര്‍ത്തിക്കുന്ന ആളാണെന്ന് ചിത്രീകരിക്കാന്‍ പാറയ്ക്കല്‍ അബ്ദുള്ള സമൂഹമാധ്യത്തില്‍ ഇട്ട പോസ്റ്റിലൂടെ ശ്രമിച്ചു, തനിക്കെതിരെ നടക്കുന്ന പ്രചാരണം വഴി സമൂഹത്തില്‍ വേര്‍തിരിവ് ഉണ്ടാക്കാന്‍ പാറക്കല്‍ അബ്ദുള്ള ശ്രമിച്ചു. പാറയ്ക്കല്‍ അബ്ദുള്ളയുടെ വ്യാജ പ്രചാരണത്തിലൂടെ തന്നെ പലരും സംശത്തോടെ വീക്ഷിക്കുന്നു.”- നോട്ടീസിൽ പറയുന്നു

അതേസമയം ഹൈക്കോടതിയില്‍ സമര്‍പ്പിച്ച പോലീസ് സത്യവാങ്മൂലത്തിലുള്ള വിവരം മാത്രമാണ് പുറത്തു വന്നതെന്നും അത് വ്യാജമാണ് എന്ന് റിബേഷിന് തോന്നുന്നുവെങ്കില്‍ ആഭ്യന്തര മന്ത്രിക്കും അന്വേഷണ ഉദ്യോഗസ്ഥര്‍ക്കുമാണ് വക്കീല്‍ നോട്ടീസ് അയക്കേണ്ടതെന്നും ഇതിനോട് പാറയ്ക്കല്‍ അബ്ദുള്ള പ്രതികരിച്ചു.