സോഷ്യൽമീഡിയ കൈയൊഴിഞ്ഞപ്പോൾ സഹായവുമായി മസ്കെത്തി; ട്വിറ്റർ അക്കൗണ്ട് തിരികെ ലഭിച്ചിട്ടും സന്തോഷിക്കാതെ ട്രംപ്; എത്രകാലം ട്വിറ്റർ നിലനിൽക്കുമെന്ന് ഉറപ്പില്ലെന്ന ഞെട്ടിക്കുന്ന മറുപടി

ന്യൂയോർക്: സമൂഹമാദ്ധ്യമങ്ങളെല്ലാം കയ്യൊഴിഞ്ഞ ട്രംപിന് ട്വിറ്റർ അക്കൗണ്ട് തിരികെ ലഭിച്ചിട്ടും യാതൊരുവിധ സന്തോഷവുമില്ല. എലോൺ മസ്‌കിന്റെ നയങ്ങളിൽ അപാകത കാണുന്ന ഡോണാൾഡ് ട്രംപ് ട്വിറ്ററിന്റെ ഭാവിയിൽ ആശങ്ക രേഖപ്പെടുത്തി. ട്രംപിന് അക്കൗണ്ട് നൽകിയതുവഴി നിലവിലെ തൊഴിൽ വിവാദത്തിൽ നിന്ന് തലയൂരാമെന്നായിരുന്നു മസ്‌കിന്റെ തന്ത്രം. എന്നാൽ ട്രംപിന്റെ നയം തിരിച്ചടിയായിരിക്കുകയാണ്.

ഏറെ വിവാദമുണ്ടാക്കി സമൂഹമാദ്ധ്യമങ്ങളിൽ നിറയാൻ ട്രംപ് നടത്തിയ ശ്രമമാണ് ട്വിറ്റർ ഇല്ലാതാക്കിയത്. തിരഞ്ഞെടുപ്പിൽ ജോബൈഡനും കമലാ ഹാരിസും അടങ്ങുന്ന സംഘം അട്ടിമറി നടത്തിയാണ് ഭരണത്തിലേറിയതെന്ന് പറഞ്ഞാണ് ട്രംപ് അനുയായികളെ ഇളക്കിമറിച്ചത്. അമേരിക്ക ഇന്നേ വരെ കാണാത്ത അക്രമം ജനാധിപത്യ പ്രതിനിധി സഭയ്‌ക്ക് നേരെ നടന്നതിനെ ലോകം അമ്പരപ്പോടെയായിരുന്നു അന്ന് കണ്ടത്. ട്രംപിൽ നിന്ന് കൂടുതൽ പ്രകോപനം ഉണ്ടാകാതിരിക്കാനാണ് ട്വിറ്റർ അക്കൗണ്ട് മരവിപ്പിച്ചത്.

എലോൺ മസ്‌ക് ട്വിറ്ററിനെ വിലയ്‌ക്കു വാങ്ങിയ ശേഷം വൻ അഴിച്ചുപണികളും പുറത്താക്കലും അതിനെതിരായ വിമർശനവും കത്തിക്കയറുകയാണ്.