ഇത് എന്റെ സ്നേഹ സമ്മാനം !ടീമിനായി മികച്ച പ്രകടനം നടത്തിയതിന് ഫാബിഞ്ഞോയ്ക്ക് ആഡംബര വാച്ച് സമ്മാനിച്ച് ആരാധകൻ; വീഡിയോ വൈറൽ

റിയാദ് : ടീമിനായി മികച്ച പ്രകടനം നടത്തിയതിന് അൽ ഇത്തിഹാദ് താരം ഫാബിഞ്ഞോയ്ക്ക് ആഡംബര റോളക്സ് വാച്ച് സമ്മാനിച്ച് ആരാധകൻ. അൽ റയീദ് ക്ലബ്ബിനെതിരെ കഴിഞ്ഞ മത്സരത്തിൽ എതിരില്ലാത്ത മൂന്നു ഗോളുകളുടെ വമ്പൻ ജയം നേടിയതിന് പിന്നാലെയാണ് അപ്രതീക്ഷിതമായി ആരാധകന്റെ വിലയേറിയ സമ്മാനം ലഭിച്ചത്. സാധാരണ മത്സരത്തിനു ശേഷം ആരാധകർക്ക് ജഴ്സിയടക്കം സമ്മാനിക്കുന്ന ഫാബിഞ്ഞോ, ആരാധകനിൽ നിന്ന് ലഭിച്ച സമ്മാനത്തിൽ അമ്പരക്കുന്നത് വീഡിയോ ദൃശ്യങ്ങളിൽ വ്യക്തമാണ്.

ഇതിനിടെ താരത്തിന്റെ കയ്യിൽനിന്ന് വാച്ച് താഴെ വീണെങ്കിലും ഉടനടി അദ്ദേഹം അത് നിലത്ത് നിന്നെടുത്തു. ആരാധകനോടു നന്ദി പറഞ്ഞ ശേഷമാണ് ബ്രസീൽ താരം ടീം ബസിൽ കയറിപോയത്. ഇംഗ്ലിഷ് പ്രീമിയർ ലീഗ് ക്ലബ് ലിവർപൂളിന്റെ മുൻ താരമാണു ഫാബിഞ്ഞോ. ഫ്രഞ്ച് താരങ്ങളായ കരീം ബെൻസെമ, എൻഗോളോ കാന്റെ എന്നിവരും അൽ ഇത്തിഹാദ് ടീമിലാണ് നിലവിൽ കളിക്കുന്നത്.