വ്യാജ ക്ലോസപ്പ് ടൂത്ത് പേസ്റ്റ് നിർമ്മാണം ! വൻ റാക്കറ്റിനെ വലയിലാക്കി ദില്ലി പോലീസ് ; 25,000 ട്യൂബുകള്‍ പിടിച്ചെടുത്തു

ദില്ലി : ഹിന്ദുസ്ഥാന്‍ യൂണിലിവറിന്റെ ഉത്പന്നങ്ങള്‍ വ്യാജമായി നിര്‍മിച്ച് വിപണയിലെത്തിച്ചിരുന്ന വന്‍ റാക്കറ്റ് പിടിയില്‍. ദില്ലി കേന്ദ്രീകരിച്ച് പ്രവര്‍ത്തിക്കുന്ന സംഘമാണ് ഇന്ന് പിടിയിലായിരിക്കുന്നത്. ഇവരിൽ നിന്ന് വ്യാജമായി നിര്‍മിച്ച ക്ലോസപ്പ് ടൂത്ത് പേസ്റ്റിന്റെ 25,000 ട്യൂബുകള്‍ പിടിച്ചെടുത്തു.

രാജ്യതലസ്ഥാനത്ത് അടുത്തിടെയായി വ്യാജ ഉൽപ്പന്ന നിർമ്മാണ ശാലകൾക്കെതിരെ നടക്കുന്ന വലിയ നടപടികളിൽ ഒന്നാണിത്.വ്യാജ പേസ്റ്റ് നിർമ്മിക്കാൻ ഉപയോഗിച്ചിരുന്ന അസംസ്‌കൃത വസ്തുക്കളും മെഷീനുകളും ഇവിടെ നിന്ന് കണ്ടെത്തിയിട്ടുണ്ട്. ഈ ഉൽപ്പന്നങ്ങൾ വിപണിയിൽ എത്തിക്കുന്നതിന് തൊട്ടുമുമ്പുള്ള ഘട്ടത്തിലായിരുന്നു പോലീസ് ഇവ പിടിച്ചെടുത്തത്.

വ്യാജ ഉൽപ്പന്നങ്ങൾ വിപണിയിൽ ശ്രദ്ധയിൽപ്പെട്ടതിനെ തുടർന്ന് കമ്പനി അധികൃതർ തന്നെ പോലീസിനെ വിവരമറിയിക്കുകയായിരുന്നുവെന്ന് ഹിന്ദുസ്ഥാൻ യൂണിലീവർ പ്രതിനിധി നരേന്ദ്ര സിങ് സ്ഥിരീകരിച്ചു. ആരോഗ്യത്തിന് ഹാനികരമായേക്കാവുന്ന നിലവാരമില്ലാത്ത ചേരുവകളാണ് വ്യാജ പേസ്റ്റുകൾ നിർമ്മിക്കാൻ ഉപയോഗിക്കുന്നതെന്നാണ് പ്രാഥമിക നിഗമനം.

ഫാക്ടറിയുടെ ഉടമയെ പോലീസ് കസ്റ്റഡിയിലെടുത്തു. നിലവിൽ പിടിച്ചെടുത്ത സാധനങ്ങൾ പോലീസ് സ്റ്റേഷനിൽ സൂക്ഷിച്ചിരിക്കുകയാണ്. ഈ വ്യാജ ഉൽപ്പന്നങ്ങൾ രാജ്യത്തിന്റെ ഏത് ഭാഗങ്ങളിലേക്കാണ് വിതരണം ചെയ്തിരുന്നതെന്നും, ഇതിനു പിന്നിൽ പ്രവർത്തിക്കുന്ന വൻകിട ശൃംഖല ഏതാണെന്നതിനെക്കുറിച്ചും ക്രൈം ബ്രാഞ്ച് വിശദമായ അന്വേഷണം ആരംഭിച്ചിട്ടുണ്ട്.

നേരത്തെ ദില്ലിയിൽ ‘എനോ’ (Eno), ‘സെൻസോഡൈൻ’ (Sensodyne) തുടങ്ങിയ ജനപ്രിയ ഉൽപ്പന്നങ്ങളുടെ വ്യാജ നിർമ്മാണശാലകൾ പിടികൂടിയിരുന്നു. കൂടാതെ, സമീപകാലത്ത് ഗുജറാത്തിലും വ്യാജ ‘കോൾഗേറ്റ്’ റാക്കറ്റ് പിടികൂടിയിരുന്നു. ഈ കേസുകളുമായി ബുരാരിയിലെ സംഭവത്തിന് ബന്ധമുണ്ടോ എന്നും പോലീസ് അന്വേഷിക്കുന്നുണ്ട്. വ്യാജ ഉൽപ്പന്നങ്ങൾ വിപണിയിലെത്തിച്ച് ഉപഭോക്താക്കളെ കബളിപ്പിക്കുന്ന ഈ റാക്കറ്റുകൾക്കെതിരെ ശക്തമായ നടപടികൾ തുടരുമെന്ന് പോലീസ് അറിയിച്ചു.