പശ്ചിമേഷ്യയിൽ വീണ്ടും യുദ്ധഭീതി: ഇറാനെതിരെ ആക്രണം സ്ഥിരീകരിച്ച് അമേരിക്ക; ലക്ഷ്യമിട്ടത് വ്യോമ പ്രതിരോധ സംവിധാനങ്ങളെ

വാഷിങ്ടൺ : പശ്ചിമേഷ്യയിൽ വീണ്ടും സംഘർഷം കനക്കുന്നു. അമേരിക്കൻ കപ്പലിന് നേരെ ഇറാൻ ആക്രമണം നടത്തിയതിന് തൊട്ടുപിന്നാലെ, ഇറാനിലെ വ്യോമ പ്രതിരോധ സംവിധാനങ്ങളെ ലക്ഷ്യമിട്ട് ശക്തമായ പ്രത്യാക്രമണം നടത്തിയതായി അമേരിക്കൻ സെൻട്രൽ കമാൻഡ് സ്ഥിരീകരിച്ചു. ഇറാനിലെ സിരിക്, ഖേഷം ദ്വീപുകളിൽ ശക്തമായ സ്ഫോടനങ്ങൾ ഉണ്ടായതായി ഇറാൻ മാധ്യമങ്ങളും സമ്മതിച്ചിട്ടുണ്ട്.

ഇറാന്റെ കപ്പലാക്രമണത്തിന് കനത്ത തിരിച്ചടി നൽകിയതോടെ പശ്ചിമേഷ്യ പൂർണ്ണമായും യുദ്ധഭീതിയുടെ നിഴലിലായിരിക്കുകയാണ്.
അമേരിക്കൻ ആക്രമണത്തിന് പിന്നാലെ ഇറാൻ തിരിച്ചടി ആരംഭിച്ചതായാണ് പുറത്തുവരുന്ന റിപ്പോർട്ടുകൾ. കുവൈത്തിന് നേരെ ഇറാന്റെ ആക്രമണം ഉണ്ടായതായും ബഹ്റൈനിൽ ഇറാൻ ആക്രമണ മുന്നറിയിപ്പ് നൽകിയതായും വിവരമുണ്ട്. അതേസമയം ഇറാനെതിരെ കടുത്ത ഭീഷണിയുമായി അമേരിക്കൻ പ്രസിഡന്റ് ഡൊണാൾഡ് ട്രമ്പ് രംഗത്തെത്തി. അമേരിക്കൻ സൈന്യം ഈ വിഷയം പൂർണ്ണമായി കൈകാര്യം ചെയ്യാൻ തീരുമാനിച്ചാൽ ഇറാൻ എന്ന രാജ്യം തന്നെ ബാക്കിയുണ്ടാകില്ലെന്നായിരുന്നു ട്രമ്പിന്റെ മുന്നറിയിപ്പ്. സംഘർഷം രൂക്ഷമായി തുടരുന്നതിനിടയിലും, ഇരുരാജ്യങ്ങളും തമ്മിലുള്ള ചർച്ചകൾ തിങ്കളാഴ്ച നടക്കുമെന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്.