തുടർച്ചയായി ഒമ്പതാം തവണയും ബജറ്റ് അവതരിപ്പിക്കുന്ന ആദ്യ ധനമന്ത്രി!! ചരിത്രനേട്ടത്തിനരികെ നിർമല സീതാരാമൻ; കേന്ദ്രബജറ്റ് ഇന്ന്

ദില്ലി : ഇന്ത്യൻ പാർലമെന്ററി ചരിത്രത്തിൽ സമാനതകളില്ലാത്ത പുതിയൊരു റെക്കോർഡ് കൂടി കുറിക്കാൻ കേന്ദ്ര ധനമന്ത്രി നിർമല സീതാരാമൻ ഒരുങ്ങുന്നു. ഇന്ന് 2026-27 സാമ്പത്തിക വർഷത്തേക്കുള്ള കേന്ദ്ര ബജറ്റ് അവതരിപ്പിക്കുന്നതോടെ, തുടർച്ചയായി ഒമ്പത് തവണ ബജറ്റ് അവതരിപ്പിക്കുന്ന രാജ്യത്തെ ആദ്യ ധനമന്ത്രി എന്ന അപൂർവ്വ നേട്ടം അവർക്ക് സ്വന്തമാകും. 2019 മെയ് 31-ന് ധനമന്ത്രിയായി ചുമതലയേറ്റ അവർ, ആറ് വർഷവും എട്ട് മാസവും ഈ പദവിയിൽ തുടർച്ചയായി പൂർത്തിയാക്കിയാണ് ഈ റെക്കോർഡ് തിരുത്തുന്നത്. ഞായറാഴ്ച ബജറ്റ് അവതരിപ്പിക്കുന്നു എന്ന പ്രത്യേകതയും ഇത്തവണയുണ്ട്.

മുൻ പ്രധാനമന്ത്രി മൊറാർജി ദേശായി 10 തവണയും പി. ചിദംബരം ഒമ്പത് തവണയും ബജറ്റുകൾ അവതരിപ്പിച്ചിട്ടുണ്ടെങ്കിലും, ആരും തന്നെ തുടർച്ചയായി ഒമ്പത് തവണ ഈ നേട്ടം കൈവരിച്ചിട്ടില്ല. 1950-കളിൽ സി.ഡി. ദേശ്‌മുഖ് തുടർച്ചയായി ആറ് വർഷത്തോളം ഈ പദവി അലങ്കരിച്ചതാണ് ഇതിനു മുൻപുള്ള പ്രധാന റെക്കോർഡ്. കോവിഡ് മഹാമാരിയും ആഗോള സാമ്പത്തിക അനിശ്ചിതത്വങ്ങളും ഉൾപ്പെടെയുള്ള വെല്ലുവിളികൾ നിറഞ്ഞ ഘട്ടങ്ങളിൽ ഇന്ത്യൻ സമ്പദ്‌വ്യവസ്ഥയെ ലോകത്തെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥയായി നിലനിർത്താൻ നിർമല സീതാരാമന് സാധിച്ചു. ഈ ചരിത്ര മുഹൂർത്തം രാജ്യത്തിന് തന്നെ അഭിമാനമാണെന്ന് പ്രധാനമന്ത്രി നരേന്ദ്രമോദി കഴിഞ്ഞ ദിവസം ബജറ്റ് സമ്മേളനത്തിന് മുന്നോടിയായി സൂചിപ്പിച്ചു.

നയപരമായ തുടർച്ചയുടെയും പ്രതിസന്ധി ഘട്ടങ്ങളിലെ മാനേജ്‌മെന്റിന്റെയും അടയാളമായാണ് നിർമല സീതാരാമന്റെ ഈ നീണ്ട സേവനകാലയളവ് വിലയിരുത്തപ്പെടുന്നത്. സ്വതന്ത്ര ഇന്ത്യയുടെ ആദ്യ ധനമന്ത്രി ആർ.കെ. ഷൺമുഖം ഷെട്ടി മുതൽ അരുൺ ജെയ്‌റ്റ്‌ലി വരെയുള്ള പ്രഗത്ഭർ ഇരുന്ന കസേരയിലാണ് നിർമല സീതാരാമൻ തന്റെ ഒമ്പതാമത്തെ ബജറ്റ് ഇന്ന് രാവിലെ 11 മണിക്ക് അവതരിപ്പിക്കുന്നത്. കേരളം ഉൾപ്പെടെയുള്ള സംസ്ഥാനങ്ങൾക്ക് ബജറ്റിൽ എന്ത് പരിഗണന ലഭിക്കുമെന്നാണ് രാജ്യം ഇപ്പോൾ ഉറ്റുനോക്കുന്നത്.