ദില്ലിയിൽ അഞ്ച് നില കെട്ടിടം തകർന്നു വീണു ! 12 പേരെ രക്ഷപ്പെടുത്തി ! നിരവധിപേർ കുടുങ്ങിക്കിടക്കുന്നുണ്ടെന്ന് സംശയം; അവശിഷ്ടങ്ങൾക്കിടയിൽ തെരച്ചിൽ തുടരുന്നു

ദില്ലി : തെക്കൻ ദില്ലിയിലെ സാകേത് മെട്രോ സ്റ്റേഷന് സമീപം അഞ്ചുനില വാണിജ്യ സമുച്ചയം തകർന്നു വീണു. അപകടത്തിൽ ഇതുവരെ 12 പേരെ രക്ഷപ്പെടുത്തിയതായും ഇതിൽ രണ്ടുപേരുടെ നില അതീവ ഗുരുതരമാണെന്നും പോലീസ് അറിയിച്ചു. സൈദുലാജാബ് ഏരിയയിലെ വെസ്റ്റേൺ മാർഗിലുള്ള കെട്ടിടം പിന്നാലെ രാത്രി 7.45-ഓടെയാണ് പൂർണ്ണമായും തകർന്നു വീണത്. കെട്ടിടത്തിനുള്ളിൽ നിരവധി ഓഫീസുകളും കഫേകളും മെഡിക്കൽ കോച്ചിംഗ് സെന്ററുകളും പ്രവർത്തിച്ചിരുന്നതിനാൽ നൂറിലധികം ആളുകൾ അവശിഷ്ടങ്ങൾക്കിടയിൽ കുടുങ്ങിക്കിടക്കാൻ സാധ്യതയുണ്ടെന്നാണ് പ്രദേശവാസികൾ പറയുന്നത്. നിലവിൽ ദേശീയ ദുരന്ത നിവാരണ സേനയുടെയും ഫയർ ഫോഴ്‌സിന്റെയും നേതൃത്വത്തിൽ യുദ്ധകാലാടിസ്ഥാനത്തിൽ രക്ഷാപ്രവർത്തനം പുരോഗമിക്കുകയാണ്.

അഞ്ചുനില കെട്ടിടം തകർന്നു വീണത് തൊട്ടടുത്തുള്ള താൽക്കാലിക കാന്റീന് മുകളിലേക്കാണ് എന്നത് അപകടത്തിന്റെ വ്യാപ്തി വർദ്ധിപ്പിച്ചു. ഈ സമയത്ത് കാന്റീനിൽ മുപ്പതോളം മെഡിക്കൽ വിദ്യാർത്ഥികൾ ഭക്ഷണം കഴിച്ചുകൊണ്ടിരിക്കുകയായിരുന്നു. കെട്ടിടം തകർന്നതിന് പിന്നാലെ പ്രദേശം മുഴുവൻ പൊടിപടലങ്ങളാൽ നിറഞ്ഞതായും അവശിഷ്ടങ്ങൾക്കിടയിൽ നിന്ന് ആളുകളുടെ നിലവിളി കേൾക്കാമായിരുന്നുവെന്നും ദൃക്‌സാക്ഷികൾ പറഞ്ഞു.

ജെ.സി.ബി എക്സ്കവേറ്ററുകൾ, ഹൈഡ്രോളിക് കട്ടറുകൾ, അത്യാധുനിക ക്യാമറകൾ, സ്നിഫർ ഡോഗ് സ്ക്വാഡ് എന്നിവയെ ഉപയോഗിച്ചാണ് അവശിഷ്ടങ്ങൾക്കിടയിലുള്ള തിരച്ചിൽ നടത്തുന്നത്. കെട്ടിടത്തിന്റെ മൂന്നാം നിലയിൽ നിർമ്മാണ പ്രവർത്തനങ്ങൾ നടക്കുന്നുണ്ടായിരുന്നുവെന്നും ഇതാണോ അപകടകാരണമെന്ന് പരിശോധിക്കുമെന്നും അധികൃതർ വ്യക്തമാക്കി. കെട്ടിടത്തിന്റെ ഉടമസ്ഥാവകാശം, നിർമ്മാണ അനുമതികൾ, സുരക്ഷാ മാനദണ്ഡങ്ങൾ എന്നിവ ലംഘിക്കപ്പെട്ടിട്ടുണ്ടോ എന്ന കാര്യത്തിൽ വിശദമായ അന്വേഷണം നടത്തുമെന്ന് സൗത്ത് ഡൽഹി ഡി.സി.പി അനന്ത് മിത്തൽ അറിയിച്ചു. സംഭവത്തിൽ കേസ് രജിസ്റ്റർ ചെയ്യാനുള്ള നടപടികൾ പോലീസ് ആരംഭിച്ചിട്ടുണ്ട്.