പത്ത് മാസത്തെ ജയിൽ വാസത്തിന് ശേഷം മുൻ കോൺഗ്രസ് പഞ്ചാബ് അദ്ധ്യക്ഷൻ നവജ്യോത് സിങ് സിദ്ദു മോചിതനായി

ദില്ലി : പത്ത് മാസത്തെ ജയിൽ വാസത്തിന് ശേഷം പഞ്ചാബിലെ മുൻ കോൺഗ്രസ് സംസ്ഥാന അദ്ധ്യക്ഷൻ നവജ്യോത് സിങ് സിദ്ദു മോചിതനായി. 1988 ൽ നടന്ന കൊലപാതകക്കേസുമായി ബന്ധപ്പെട്ടായിരുന്നു നവജ്യോത് സിദ്ദു ശിക്ഷിക്കപ്പെട്ടിരുന്നു.

കഴിഞ്ഞ വർഷമാണ് സിദ്ദുവിനെ സുപ്രീം കോടതി ജയിൽ ശിക്ഷയ്ക്ക് വിധിച്ചത്. സിദ്ദുവും സുഹൃത്തും ചേർന്ന് അറുപത്തിയഞ്ചുകാരനായ ഗുർനാം സിങ്ങിനെ വധിച്ചുവെന്നാണ് കേസ്. 1988 ഡിസംബർ 27നായിരുന്നു സംഭവം. പാർക്കിങ് സ്ഥലവുമായി ബന്ധപ്പെട്ട തർക്കത്തെത്തുടർന്ന് ഗുർനാമിനെ ആക്രമിച്ച് ഗുരുതരമായി പരുക്കേൽപ്പിക്കുകയായിരുന്നു. ആശുപത്രിയിൽ പ്രവേശിപ്പിക്കപ്പെട്ട ഗുർനാം പിന്നീട് മരിച്ചു.

2018ൽ കേസ് പരിഗണിച്ച സുപ്രീം കോടതി 1000 രൂപ പിഴ ഒടുക്കാനാണ് നിർദേശിച്ചിരുന്നത് . പിന്നീട് സുപ്രീം കോടതി തന്നെ വിധി പുനർപ്പരിശോധിക്കുകയും സിദ്ദുവിന് ജയിൽ ശിക്ഷ വിധിക്കുകയുമായിരുന്നു. പഞ്ചാബ് നിയമസഭാ തെരഞ്ഞെടുപ്പിൽ കോൺഗ്രസ് പരാജയപ്പെട്ടതോടെയാണ് സംസ്ഥാന അധ്യക്ഷ പദവി സിദ്ദു രാജിവച്ചത്.