മുൻ ഇന്ത്യൻ ഓൾറൗണ്ടർ സലിം ദുറാനി അന്തരിച്ചു; വിടവാങ്ങിയത് ഇന്ത്യൻ ക്രിക്കറ്റ് കടന്നു പോയ ചരിത്ര നിമിഷങ്ങൾക്ക് സാക്ഷ്യം വഹിച്ച താരം

ഇന്ത്യൻ ക്രിക്കറ്റ് ടീം കടന്നുപോയ ചരിത്ര നിമിഷങ്ങൾക്ക് സാക്ഷ്യം വഹിച്ച മുൻ ഇന്ത്യൻ ഓൾറൗണ്ടർ സലിം ദുറാനി അന്തരിച്ചു. 88 വയസായിരുന്നു. ഇക്കഴിഞ്ഞ ജനുവരിൽ വീട്ടിൽ വഴുതി വീണതിനെത്തുടർന്ന് തുടയെല്ല് പൊട്ടി ശസ്ത്രക്രിയയ്ക്ക് വിധേയനായി ,സഹോദരന്റെ വീട്ടിൽ ചികിത്സയിൽ കഴിയുകയായിരുന്നു അദ്ദേഹം. അഫ്ഗാനിസ്ഥാന്റെ തലസ്ഥാനമായ കാബൂളാണ് സലിം ദുറാനിയുടെ ജന്മദേശം. ഇന്ത്യക്കായി കളിച്ച അഫ്ഗാൻ വേരുകളുള്ള ഒരേയൊരു ക്രിക്കറ്ററാണ് ദുറാനി.

ഇന്ത്യയ്ക്ക് വേണ്ടി 29 ടെസ്റ്റുകളിൽ ജേഴ്‌സിയണിഞ്ഞ ദുറാനി തന്റെ സ്ഫോടനാത്മക ബാറ്റിംഗ് കൊണ്ടാണ് ആരാധകരെ വിസ്മയിപ്പിച്ചത്. . 1961-62 ലെ ഇംഗ്ലണ്ടിനെതിരായ ടെസ്റ്റ് പരമ്പരയിൽ ഇന്ത്യ നേടിയ ചരിത്ര വിജയത്തിൽ ദുറാനി ഇംഗ്ലീഷ് വിക്കറ്റുകൾ പിഴുതെറിഞ്ഞുകൊണ്ട് നിർണ്ണായക പങ്ക് വഹിച്ചു. ടെസ്റ്റ് കരിയറിൽ 1202 റൺസ് നേടിയ താരം ഒരു സെഞ്ചുറിയും ഏഴ് അർധ സെഞ്ചുറിയും നേടി. ക്രിക്കറ്റിലെ സംഭാവനകൾ പരിഗണിച്ച് ഇന്ത്യ അദ്ദേഹത്തെ അർജുന അവാർഡ് നൽകി ആദരിച്ചു.ഇതോടെ അർജുന അവാർഡ് ലഭിക്കുന്ന ആദ്യ ക്രിക്കറ്ററെന്ന നേട്ടവും അദ്ദേഹത്തെ തേടിയെത്തി. 2011ൽ സികെ നായിഡു അവാർഡും അദ്ദേഹത്തിനു ലഭിച്ചു.