മുൻ ഇറ്റാലിയൻ പ്രധാനമന്ത്രി സിൽവിയോ ബെർലുസ്കോണി അന്തരിച്ചു

മിലാൻ : മുൻ ഇറ്റാലിയൻ പ്രധാനമന്ത്രി സിൽവിയോ ബെർലുസ്കോണി (86) അന്തരിച്ചു. ശ്വാസകോശ അണുബാധയെ തുടർന്ന് മിലാനിലെ സാൻ റഫേൽ ആശുപത്രിയിൽ ചികിത്സിയിലിരിക്കെയായിരുന്നു അന്ത്യം. രാജ്യത്തെ ശതകോടീശ്വരനും മാദ്ധ്യമവ്യവസായിയുമായ അദ്ദേഹം 1994ലാണ് ആദ്യമായി അധികാരത്തിൽ വരുന്നത്. പിന്നീട് 2011 വരെയുള്ള കാലയളവിൽ നാലു തവണ പ്രധാനമന്ത്രിയായി.

നിരവധി ലൈംഗികാരോപണങ്ങളും അഴിമതി ആരോപണങ്ങളും നേരിടേണ്ടി വന്ന ബെർലുസ്കോണി നികുതി തട്ടിപ്പിനു ശിക്ഷയും അനുഭവിച്ചിട്ടുണ്ട്. ഇറ്റലിയിലെ ഏറ്റവും വലിയ വാണിജ്യ ബ്രോഡ്കാസ്റ്ററായ മീഡിയസെറ്റിന്റെ സ്ഥാപകനായ അദ്ദേഹം 1986നും 2017നും ഇടയിൽ എസി മിലാൻ ഫുട്ബോൾ ക്ലബിന്റെ ഉടമയുമായിരുന്നു.

1993ലാണ് അദ്ദേഹം ഫോർസ ഇറ്റാലിയ പാർട്ടി സ്ഥാപിച്ചത്. ഇതിന് ശേഷം ഒരു വർഷത്തിനുള്ളിൽ അദ്ദേഹം പ്രധാനമന്ത്രി സ്ഥാനത്തേയ്ക്ക് എത്തി. 2008ലും അധികാരത്തിലേറിയെങ്കിലും 2011ൽ രാജിവയ്‌ക്കേണ്ടി വന്നു. 2012 അവസാനത്തോടെ നികുതി തട്ടിപ്പിനു ബെർലുസ്കോണി ശിക്ഷിക്കപ്പെട്ടു. മിലാനിലെ ഒരു റെസിഡൻഷ്യൽ ഹോമിൽ പാർട്ട് ടൈം കമ്യൂണിറ്റി സേവനം ചെയ്തുകൊണ്ട് ഒരു വർഷത്തോളം തടവ് ശിക്ഷ അനുഭവിച്ചു.

2018ലെ തെരഞ്ഞെടുപ്പിൽ ബ്രദേഴ്‌സ് ഓഫ് ഇറ്റലിയുമായി സഖ്യമുണ്ടാക്കി മത്സരിച്ചുവെങ്കിലും അധികാരം തിരികെപ്പിടിക്കാനായില്ല. 2019ൽ ബെർലുസ്കോണി യൂറോപ്യൻ പാർലമെന്റിൽ ഒരു സീറ്റ് നേടി. എന്നാൽ 2022 ഒക്ടോബറിൽ നടന്ന തെരഞ്ഞെടുപ്പിൽ സഖ്യം വിജയം നേടിയതോടെ അദ്ദേഹത്തിന്റെ പാർട്ടി അധികാരത്തിൽ തിരിച്ചെത്തി. പിന്നാലെ ബെർലുസ്കോണി സെനറ്ററായും തിരഞ്ഞെടുക്കപ്പെട്ടു.