വസീറാബാദിൽ റാലിക്കിടെ പാകിസ്ഥാൻ മുൻ പ്രധാനമന്ത്രി ഇമ്രാൻ ഖാന്റെ കാലിന് വെടിയേറ്റതായി റിപ്പോർട്ട്;ഇമ്രാൻ ഖാന്റെ കണ്ടെയ്‌നറിന് സമീപമാണ് വെടിവയ്പുണ്ടായത്,മാനേജർ ഉൾപ്പടെ 5 സഹപ്രവർത്തകർക്കും പരിക്ക്

വ്യാഴാഴ്ച പാകിസ്ഥാനിലെ വസീറാബാദിൽ നടന്ന റാലിക്കിടെ വെടിവെപ്പിൽ മുൻ പാകിസ്ഥാൻ പ്രധാനമന്ത്രി ഇമ്രാൻ ഖാന്റെ കാലിന് വെടിയേറ്റതായി റിപ്പോർട്ട്. ഇമ്രാൻ ഖാന്റെ കണ്ടെയ്‌നറിന് സമീപമാണ് വെടിവയ്പുണ്ടായത്. വെടിവെപ്പിനെ തുടർന്ന് കണ്ടെയ്‌നറിൽ നിന്ന് ഇദ്ദേഹത്തെ ബുള്ളറ്റ് പ്രൂഫ് വാഹനത്തിലേക്ക് മാറ്റിയതായി റിപ്പോർട്ടുകൾ പറയുന്നു. മാനേജർ ഉൾപ്പടെ അഞ്ച് സഹപ്രവർത്തകർക്ക് പരിക്കേറ്റതായും റിപ്പോർട്ടുകൾ കൂട്ടിച്ചേർത്തു.അക്രമിയെ പൊലീസ് കസ്റ്റഡിയിലെടുത്തിട്ടുണ്ട്.

റാലിയിൽ സംസാരിക്കാൻ ഒരുങ്ങവെ അദ്ദേഹം സഞ്ചരിച്ചിരുന്ന കണ്ടെയ്നറിലേക്ക് വെടിയുതിർക്കുകയായിരുന്നു. വിവിധ വിഷയങ്ങൾ ഉന്നയിച്ച് ഒക്ടോബർ 28 നാണ് ഇമ്രാൻ ഖാൻ ലാഹോറിൽ നിന്ന് ഇസ്ലാമാബാദിലേക്ക് പ്രതിഷേധ മാർച്ച് ആരംഭിച്ചത്.2007ൽ റാലിക്കിടെ വെടിയേറ്റു മുൻ പ്രധാനമന്ത്രി ബേനസീർ ഭൂട്ടോ കൊല്ലപ്പെട്ട സംഭവം ഓർമിപ്പിക്കുന്നതാണ് ഇമ്രാനു നേരെയുണ്ടായ ആക്രമണമെന്നു രാജ്യാന്തര മാധ്യമങ്ങൾ റിപ്പോർട്ട് ചെയ്തു. വെടിവയ്പിൽ ഇമ്രാനും നേതാക്കൾക്കും പരുക്കേറ്റതിന്റെ ഞെട്ടലിലാണു ‌പാർട്ടി പ്രവർത്തകർ. പ്രദേശത്ത് വലിയ സംഘർഷാവസ്ഥയാണ് മാധ്യമങ്ങൾ റിപ്പോർട്ട് ചെയ്തിരിക്കുന്നത്.