വിജയ് സർക്കാരിന്റെ പേരിൽ തട്ടിപ്പ്;മൊട്ടയടിച്ചാൽ 15000 രൂപവ്യാജ വാഗ്ദാനത്തിൽ സ്ത്രീകൾ ഇരയായി

ചെന്നൈ: മുടിയിലൂടെ പടരുന്ന പകർച്ചവ്യാധിയിൽനിന്ന് രക്ഷനേടാൻ തല മൊട്ടയടിക്കുന്ന സ്ത്രീകൾക്ക് 15,000 രൂപ വീതം സർക്കാർ സാമ്പത്തിക സഹായം നൽകുമെന്ന വ്യാജ വാഗ്ദാനത്തിൽ തട്ടിപ്പ്. സർക്കാർ ഉദ്യോഗസ്ഥ ചമഞ്ഞ് ഫോണിൽ ബന്ധപ്പെട്ടാണ് തട്ടിപ്പു നടത്തിയത്. വാഗ്ദാനം പൂർണ്ണമായും വിശ്വസിച്ച് സേലം ജില്ലയിലെ മൂന്ന് സ്ത്രീകൾ തല മൊട്ടയടിച്ച് വഞ്ചിക്കപ്പെടുകയായിരുന്നു.

​കുടുംബാംഗങ്ങളുടെ പേരുവിവരങ്ങൾ കൃത്യമായി പറഞ്ഞുവിശ്വസിപ്പിച്ച് വിശ്വാസ്യത നേടിയെടുത്ത ശേഷമാണ് തട്ടിപ്പുകാരൻ ഈ വ്യാജ പദ്ധതിയെക്കുറിച്ച് സംസാരിച്ചത്. കോവിഡിന് സമാനമായ ഒരു പകർച്ചവ്യാധി മുടിയിലൂടെ അതിവേഗം പടരുന്നുണ്ടെന്നും രോഗബാധ തടയാൻ ഉടൻതന്നെ മൊട്ടയടിക്കണമെന്നുമായിരുന്നു ഇയാളുടെ നിർദ്ദേശം.

​മൊട്ടയടിക്കുന്ന സ്ത്രീകൾക്ക് തമിഴ്നാട് സർക്കാർ 15,000 രൂപയും വിദ്യാർഥികൾക്ക് 45,000 രൂപയും ലാപ്ടോപ്പും നൽകുമ്പോൾ, വീട്ടിലെ പുരുഷന്മാർക്ക് തലയൊന്നിന് 60,000 രൂപ വീതം സാമ്പത്തിക സഹായം ലഭിക്കുമെന്നും ഇയാൾ വിശ്വസിപ്പിച്ചു. അടുത്ത ദിവസം ഉദ്യോഗസ്ഥർ നേരിട്ട് ഗ്രാമത്തിലെത്തി മൊട്ടയടിച്ചവർക്ക് മാത്രം പണം വിതരണം ചെയ്യുമെന്നും അറിയിച്ചിരുന്നു. എന്നാൽ, ഇവർ മൊട്ടയടിച്ചതിനുശേഷം ഉദ്യോഗസ്ഥന്റെ ഫോൺ നമ്പർ ബന്ധപ്പെടാൻ ശ്രമിച്ചെങ്കിലും സ്വിച്ച് ഓഫ് ചെയ്ത നിലയിലാണെന്ന് കണ്ടെത്തി. തുടർന്ന് നടത്തിയ അന്വേഷണത്തിലാണ് തട്ടിപ്പ് പുറത്തുവന്നത്.