ജി 20 ഉച്ചകോടി; സെപ്തംബർ എട്ടിന് യുഎസ് പ്രസിഡന്റ് ജോ ബൈഡൻനുമായി കൂടിക്കാഴ്ച്ചക്കൊരുങ്ങി പ്രധാനമന്ത്രി; സ്ഥിരീകരണവുമായി വൈറ്റ് ഹൗസ്

ദില്ലി: ജി 20 ഉച്ചകോടിയ്‌ക്ക് മുന്നോടിയായി യുഎസ് പ്രസിഡന്റ് ജോ ബൈഡൻനുമായി കൂടിക്കാഴ്ച്ചക്കൊരുങ്ങി പ്രധാനമന്ത്രി നരേന്ദ്രമോദി. സെപ്തംബർ 9,10 തീയതികളിലാണ് ജി 20 ഉച്ചകോടി നടക്കുന്നത്. സെപ്തംബർ എട്ടിനാണ് ഇരുവരുടെയും കൂടിക്കാഴ്ച നടക്കുക.

ദില്ലിയിൽ നടക്കുന്ന ജി 20 ഉച്ചകോടിയിൽ പങ്കെടുക്കാൻ ബൈഡൻ ഇന്ത്യയിൽ എത്തുമെന്നും ചരിത്രപരമായ യോഗത്തിന്റെ ഭാഗമായി പ്രധാനമന്ത്രി നരേന്ദ്രമോദിയുമായി ഉഭയകക്ഷി ചർച്ചകൾ നടത്തുമെന്നും വൈറ്റ ഹൗസ് അറിയിച്ചു. കൂടിക്കാഴ്ചയിൽ റഷ്യൻ-യുക്രെയ്ൻ യുദ്ധം സംബന്ധിച്ച വിഷയങ്ങൾ, ലോകബാങ്ക് ഉൾപ്പെടെയുള്ള വികസന ബാങ്കുകളുടെ ശേഷി വർദ്ധിപ്പിക്കാൻ വേണ്ട നടപടികൾ, ആഗോള വെല്ലുവിളികളെ നേരിടുന്നതിനുള്ള പദ്ധതികൾ എന്നിവയാണ് ഇരു നേതാക്കളും ചർച്ചചെയ്യുക.

ജി 20 ഉച്ചകോടിയ്‌ക്കായി രാജ്യതലസ്ഥാനം സുസജ്ജമായിരിക്കുകയാണ്. ഉച്ചകോടിയുടെ ഭാഗമായി വൻ സുരക്ഷാ സന്നാഹങ്ങളാണ് ഡൽഹിയിൽ ഏർപ്പെടുത്തിയിരിക്കുന്നത്. ഇന്ത്യൻ വ്യോമസേനയുടെ നിരീക്ഷണ വിമാനങ്ങളും രാജ്യതലസ്ഥാനത്ത് വിന്യസിച്ചിട്ടുണ്ട്.