ലഭിക്കുന്നത് വൻ ലാഭം: രാസലഹരിക്കടത്തിലേക്ക് കളം മാറ്റിചവിട്ടി സ്വർണക്കടത്തു സംഘങ്ങൾ പോപ്പുലർ ഫ്രണ്ടടക്കമുള്ള സംഘടനകൾക്ക് ഫണ്ട് നൽകുന്നുവെന്ന് സംശയം ; കൊടുവള്ളി സംഘത്തിന് പിന്നാലെ കേന്ദ്ര ഏജൻസികൾ

കൊച്ചി ; കേരളത്തിൽ സ്വർണക്കടത്തിനു കുപ്രസിദ്ധിയാർജിച്ച കൊടുവള്ളി സംഘങ്ങൾ രാസലഹരികടത്ത് ബിസിനസിലേക്കു ചുവടുമാറ്റുന്നതായി റിപ്പോർട്ട്. ഏതാനും ദിവസം മുമ്പു ബെംഗളുരുവിൽനിന്നു ലഹരി കടത്തുന്നതിനിടെ രാസലഹരിയുമായി പിടിയിലായ വ്യക്തിയാണ് ഇക്കാര്യം വെളിപ്പെടുത്തിയത്. ലഹരി കൂടിയ അളവിൽ ഉപയോഗിച്ച നിലയിൽ പിടിയിലായ ഇയാൾ പത്തു ലക്ഷം രൂപയാണ് പോലീസിനു വാഗ്ദാനം ചെയ്തത് .

ഇവിടെ രാസലഹരി ഉൽപാദിപ്പിക്കുന്ന സംഘങ്ങൾ പ്രവർത്തിക്കുന്നുണ്ടെന്നും അതുകൊണ്ടു കുറഞ്ഞ നിരക്കിൽ വിൽക്കാൻ സാധിക്കുന്നുണ്ടെന്നുമാണ് ഇയാൾ പറഞ്ഞത്. വിദേശത്തുനിന്നു ഡാർക് നെറ്റിലൂടെ ഓർഡർ ചെയ്തു വരുത്തിയ ലഹരിയാണു ഉപയോഗിച്ചത് എന്നാണ് ഇയാൾ പറഞ്ഞത്.

കൊടുവളളിയിലെ സംഘവുമായി ഇടപാടിനു ശ്രമിച്ചപ്പോൾ ഗുണമേന്മ കുറഞ്ഞ ഉൽപന്നമാണു ലഭിച്ചത്. ഗുണമേന്മ ഇല്ലെന്ന് പറഞ്ഞപ്പോൾ കൂടുതൽ ഗുണമുള്ളതു നിർമിച്ചു നൽകാമെന്നു സംഘം പറഞ്ഞു.സംസ്ഥാനത്ത് ലഹരി ഉപയോഗിക്കുന്നവരുടെ എണ്ണം കൂടുന്നതും സ്വർണക്കടത്തിലുണ്ടാകുന്ന തിരിച്ചടികളുമാണു ലഹരി ഇടപാടിലേക്കു സംഘത്തെ മാറ്റി ചിന്തിപ്പിച്ചതെന്നും വെളിപ്പെടുത്തലുണ്ട്.

പോപ്പുലർ ഫ്രണ്ട് അടക്കമുള്ളവ പ്രവർത്തനങ്ങൾക്കായി 100 കോടി രൂപയോളം അനായാസം സംഘടിപ്പിച്ചത് ഈ ലഹരി നിർമാണ സംഘത്തിന്റെ പിന്തുണയിലാണെന്ന ആരോപണം ഉയർന്നിരുന്നു. ഇതിനു പിന്നാലെ ഇവർക്കെതിരെ കേന്ദ്ര ഏജൻസികൾ അന്വേഷണം കടുപ്പിച്ചിരുന്നു . ഇതും ഇവർ സ്വർണ്ണക്കടത്ത് ഉപേക്ഷിക്കാൻ കാരണമായതായി പറപ്പെടുന്നു .