യുപിയ്ക്ക് ഇത് വികസനകുതിപ്പിന്റെ കാലം; ”ഗംഗാ എക്‌സ്പ്രസ് വേയ്ക്ക്” പ്രധാനമന്ത്രി ഇന്ന് തറക്കല്ലിടും

ലക്‌നൗ: ഉത്തർപ്രദേശിന്റെ മുഖച്ഛായ മാറ്റുന്ന ഗംഗാ എക്‌സ്പ്രസ് വേയ്ക്ക് (Ganga Expressway) പ്രധാനമന്ത്രി നരേന്ദ്രമോദി ഇന്ന് തറക്കല്ലിടും. പ്രയാഗ് രാജ് മുതൽ മീററ്റ് വരെ 594 കിലോമീറ്റർ നീളത്തിൽ 12 ജില്ലകളെ ബന്ധിപ്പിച്ചുകൊണ്ട് എക്‌സ്പ്രസ് വേ നിർമ്മിക്കാനാണ് പദ്ധതിയിട്ടിരിക്കുന്നത്. 2020, നവംബർ 26 നാണ് യോഗി സർക്കാർ ഗംഗാ എക്‌സ്പ്രസ് വേ പദ്ധതിക്ക് അനുമതി നൽകിയത്. കിഴക്കൻ ഉത്തർപ്രദേശിനെയും പടിഞ്ഞാറൻ ഉത്തർപ്രദേശിനെയും ബന്ധിപ്പിക്കുന്ന എക്‌സ്പ്രസ് വേ അയൽ സംസ്ഥാനങ്ങളിലേക്കുളള യാത്ര സൗകര്യപ്രദമാക്കും.

ഹപൂർ, ബുലാന്ദ്ഷാഹർ, അംറോഹ, ഷാജഹാൻപർ എന്നിങ്ങനെ പന്ത്രണ്ട് സംസ്ഥാനങ്ങളെ ബന്ധിപ്പിച്ചുകൊണ്ടാണ് നിർമ്മാണം. 36,230 കോടി രൂപയാണ് പദ്ധതിയുടെ ആകെ നിർമ്മാണ ചെലവായി കണക്കാക്കിയിരിക്കുന്നത്. അദാനി എന്റർപ്രൈസും ഐആർബി ഇൻഫ്രാസ്ട്രക്ചർ ഡെവലപ്പേഴ്‌സുമാണ് നിർമ്മാണ കരാർ ഏറ്റെടുത്തിരിക്കുന്നത്. മറ്റ് എക്‌സ്പ്രസ് വേകളിലേതുപോലെ തന്നെ എയർക്രാഫ്റ്റ് എമർജൻസി ലാൻഡിംഗ് സംവിധാനങ്ങളും ഇതിലുണ്ടാകും. വ്യവസായം, വ്യാപാരം, കൃഷി, വിനോദസഞ്ചാരം തുടങ്ങിയ മേഖലകൾക്ക് ഈ എക്‌സ്പ്രസ് വേ സഹായകമാകുമെന്നാണ് വിലയിരുത്തൽ. ഇതോടെ യുപി വീണ്ടും വികസനത്തിന്റെ പാതയിൽ കുതിക്കുകയാണ്.