കെട്ടടങ്ങാതെ ‘ജെൻ -സി’ പ്രക്ഷോഭം !പോലീസ് വെടിവയ്പിൽ കൊല്ലപ്പെട്ടവരുടെ എണ്ണം 19 ആയി; നേപ്പാൾ ആഭ്യന്തര മന്ത്രി രാജി വച്ചു

പി. ശർമ ഒലി സർക്കാരിന്റെ അഴിമതിക്കും സ്വജനപക്ഷപാതത്തിനും 26 സോഷ്യൽ മീഡിയ പ്ലാറ്റ്‌ഫോമുകൾക്ക് ഏർപ്പെടുത്തിയ നിരോധനത്തിനുമെതിരെ നേപ്പാളിൽ ‘ജെൻ -സി ‘ തലമുറയുടെ നേതൃത്വത്തിൽ നടക്കുന്ന പ്രക്ഷോഭത്തിനിടെ പാർലമെന്റിലേക്കു നടന്ന പ്രതിഷേധ മാർച്ചിനു നേരേ പോലീസ് നട‌ത്തിയ വെടിവയ്പിൽ കൊല്ലപ്പെട്ടവരുടെ എണ്ണം 19 ആയി. നാനൂറിലേറെപ്പേർക്ക് പരുക്കേറ്റു.

പരുക്കേറ്റവരിൽ‌ പത്തോളം പേരുടെ നില ഗുരുതരമാണെന്ന് ന്യൂ ബനേശ്വറിലെ ആശുപത്രി അധികൃതരെ ഉദ്ധരിച്ച് നേപ്പാൾ മാധ്യമങ്ങൾ റിപ്പോർട്ട് ചെയ്തു. തലസ്ഥാനമായ കഠ്മണ്ഡുവിന്റെ വിവിധ ഭാഗങ്ങളിൽ നിരോധനാജ്ഞ പ്രഖ്യാപിച്ചിട്ടുണ്ട്. രാജ്യത്തെ പ്രധാന നഗരങ്ങളിലെല്ലാം വലിയ പ്രതിഷേധ റാലികൾ നടക്കുകയാണ്. റാലികൾക്കു നേരെ പൊലീസ് ജലപീരങ്കികളും കണ്ണീർ വാതകവും പ്രയോഗിക്കുന്നുണ്ട്. അതിനിടെ, അനിഷ്ട സംഭവങ്ങളുടെ ഉത്തരവാദിത്വമേറ്റെടുത്ത് ആഭ്യന്തര മന്ത്രി രമേഷ് ലേഖക് രാജിവച്ചു. ആക്രമണങ്ങളുടെ പശ്ചാത്തലത്തിൽ ചേർന്ന അടിയന്തര മന്ത്രിസഭായോഗത്തിലാണ് ലേഖക് പ്രധാനമന്ത്രി കെ.പി.ശർമ ഒലിക്ക് രാജിക്കത്ത് കൈമാറിയത്. കഴിഞ്ഞവർഷം ജൂലൈയിലാണ് ലേഖക് ആഭ്യന്തര മന്ത്രിയായി ചുമതലയേറ്റെടുത്തത്.

സെപ്റ്റംബർ 4-ന് ആശയവിനിമയ, വിവരസാങ്കേതിക മന്ത്രാലയത്തിൽ രജിസ്റ്റർ ചെയ്യാത്ത 26 സോഷ്യൽ മീഡിയ പ്ലാറ്റ്‌ഫോമുകൾക്ക് സർക്കാർ നിരോധനമേർപ്പെടുത്തിയിരുന്നു. ഫേസ്ബുക്ക്, ട്വിറ്റർ, വാട്‌സ്ആപ്പ്, യൂട്യൂബ് തുടങ്ങിയ പ്രധാന പ്ലാറ്റ്‌ഫോമുകളെല്ലാം ഇതിൽ ഉൾപ്പെടുന്നു. ഈ നിരോധനമാണ് പ്രക്ഷോഭത്തിന് തീ കൊളുത്തിയത്. നിയമപരമായ നടപടിയെന്നാണ് സർക്കാർ ഇതിനെ ന്യായീകരിക്കുന്നതെങ്കിലും, ഇത് വിമർശകരെയും സംഘടിത പ്രക്ഷോഭങ്ങളെയും അടിച്ചമർത്താനുള്ള ശ്രമമാണെന്ന് പ്രതിഷേധക്കാർ ആരോപിക്കുന്നു. ടിക് ടോക്ക്, റെഡ്ഡിറ്റ് പോലുള്ള പ്ലാറ്റ്‌ഫോമുകൾ ഉപയോഗിച്ചാണ് യുവജനങ്ങൾ പ്രതിഷേധം സംഘടിപ്പിച്ചത്.