പ്ലാറ്റ്‌ഫോം ടിക്കറ്റുകൾക്കും വിദ്യാർത്ഥി ഹോസ്റ്റലുകൾക്കും ജിഎസ്ടി ഒഴിവാക്കും ! സുപ്രധാന തീരുമാനങ്ങളുമായി കേന്ദ്രസർക്കാർ

ദില്ലിയിൽ ചേർന്ന അൻപത്തിമൂന്നാമത് ജിഎസ്ടി കൗൺസിൽ യോഗത്തിൽ സുപ്രധാന തീരുമാനങ്ങളുമായി കേന്ദ്രസർക്കാർ. പ്ലാറ്റ്‌ഫോം ടിക്കറ്റുകൾക്കും വിദ്യാർത്ഥി ഹോസ്റ്റലുകൾക്കും ജിഎസ്ടി ഒഴിവാക്കാൻ തീരുമാനിച്ചതായി കേന്ദ്ര ധനകാര്യമന്ത്രി നിർമ്മല സീതാരാമൻ അറിയിച്ചു. വിദ്യാഭ്യാസ സ്ഥാപനങ്ങൾക്ക് പുറത്ത് സ്ഥിതി ചെയ്യുന്ന ഹോസ്റ്റലുകൾക്കും തീരുമാനം ബാധകമാകും. പ്രതിമാസം 20,000 രൂപ വരെ വാടകയും മിനിമം 90 ദിവസത്തെ താമസവും വാഗ്ദാനം ചെയ്യുന്ന ഹോസ്റ്റലുകൾക്ക് ഇതിന്റെ ഗുണഫലം ലഭിക്കും

മിൽക്ക് കാനുകളുടെ ജിഎസ്ടി 18 ശതമാനത്തിൽ നിന്നും 12 ശതമാനമാക്കി നിജപ്പെടുത്താൻ യോഗം ശുപാർശ ചെയ്തു. സ്റ്റീൽ,ഇരുമ്പ്, അലൂമിനിയം കാനുകളിൽ വിൽക്കുന്ന പാലിന് ഇതോടെ വില കുറയും. .

2024-25 സാമ്പത്തിക വർഷത്തെ ജി എസ് ടി റിട്ടേണുകൾ ഫയൽ ചെയ്യാനുള്ള അവസാന തീയതി ജൂൺ 30 വരെ ദീർഘിപ്പിച്ചു. 2017-18, 2018-19, 2019-20 സാമ്പത്തിക വർഷങ്ങളിലെ ഡിമാൻഡ് നോട്ടീസുകളിന്മേൽ 2025 മാർച്ച് 31ന് മുൻപായി കുടിശ്ശിക തീർത്താൽ പലിശയും പിഴയും ഒഴിവാക്കും. വ്യാജ ബില്ലുകൾക്കും കടലാസ് കമ്പനികൾക്കും തടയിടാൻ പാൻ ഇന്ത്യൻ തലത്തിൽ ബയോമെട്രിക് സംവിധാനം ഏർപ്പെടുത്തുമെന്ന് ധനമന്ത്രി നിർമ്മല സീതാരാമൻ വ്യക്തമാക്കി. വ്യാജ രജിസ്ട്രേഷനുകൾക്കെതിരെ ശക്തമായ നടപടികളുമായി കേന്ദ്ര സർക്കാർ മുന്നോട്ട് പോകുമെന്നും ധനമന്ത്രി അറിയിച്ചു.