പ്രധാനമന്ത്രി നരേന്ദ്ര മോദിക്ക് പരമോന്നത ബഹുമതികള്‍ നല്‍കി ആദരിച്ച് ഗയാനയും ബാര്‍ബഡോസും ഡൊമിനിക്കയും ! മോദിക്ക് ലഭിച്ച അന്താരാഷ്ട്ര ബഹുമതികള്‍ 19 ആയി

പ്രധാനമന്ത്രി നരേന്ദ്ര മോദിക്ക് രാജ്യത്തെ പരമോന്നത ബഹുമതികള്‍ നല്‍കി ആദരിച്ച് ഗയാനയും ബാര്‍ബഡോസും ഡൊമിനിക്കയും. ദ ഓഡര്‍ ഓഫ് എക്‌സലന്‍സ് നൽകി ഗയാനയും ഓണററി ഓഡര്‍ ഓഫ് ഫ്രീഡം നൽകി ബാര്‍ബഡോസും അവാര്‍ഡ് ഓഫ് ഓണര്‍ നല്‍കി ഡൊമിനിക്കയും അദ്ദേഹത്തെ ആദരിച്ചു. ഇതോടെ പ്രധാനമന്ത്രിക്ക് ലഭിച്ച അന്താരാഷ്ട്ര ബഹുമതികള്‍ 19 ആയി.

ഗയാന പ്രസിഡന്റ് മുഹമ്മദ് ഇര്‍ഫാന്‍ അലിയുടെ പ്രത്യേക ക്ഷണപ്രകാരമാണ് പ്രധാനമന്ത്രി സന്ദര്‍ശനത്തിനെത്തിയത്. കഴിഞ്ഞ കൊല്ലം ജനുവരിയില്‍ നടന്ന പ്രവാസി ഭാരതീയ ദിവസ് പരിപാടിയിലെ മുഖ്യാതിഥി ഗയാന പ്രസിഡന്റ് ഇര്‍ഫാന്‍ അലിയായിരുന്നു. കഴിഞ്ഞ അൻപത് വർഷത്തിനിടെ ഗയാന സന്ദര്‍ശിക്കുന്ന ആദ്യ ഇന്ത്യന്‍ പ്രധാനമന്ത്രിയാണ് നരേന്ദ്ര മോദി. ജനാധിപത്യത്തിന്റെ ദീര്‍ഘകാലപാരമ്പര്യമുള്ള ഗയാനയോട് തനിക്കേറെ ബഹുമാനമുണ്ടെന്നും ഇന്ത്യയോട് വളരെ ബഹുമാനം പുലര്‍ത്തുന്ന ഗയാനയുമായി നല്ല ബന്ധം ഉണ്ടാക്കുന്നതിന് തന്റെ ഭാഗത്തുനിന്ന് എല്ലാവിധ ശ്രമങ്ങളുമുണ്ടാകുമെന്നും നരേന്ദ്രമോദി പറഞ്ഞിരുന്നു.