ഗാസയിലെ ജനവാസ കേന്ദ്രത്തിൽ ഹമാസിന്റെ രഹസ്യതുരങ്കം; ഉളളിൽ പ്രത്യേകം നിർമ്മിച്ച മുറികളും ആയുധങ്ങളും; തകർത്തെറിഞ്ഞ് ഇസ്രായേൽ സൈന്യം

ഗാസ: ജനവാസ കേന്ദ്രത്തിൽ ഹമാസിന്റെ രഹസ്യതുരങ്കം തകർത്തെറിഞ്ഞ് ഇസ്രായേൽ സൈന്യം. സെൻട്രൽ ഗാസയിലാണ് ഒരു കിലോമീറ്റർ വരുന്ന തുരങ്കം ഇസ്രായേൽ സൈന്യം തകർത്തത്. ഹമാസ് അണ്ടർഗ്രൗണ്ട് ഓപ്പറേഷനുകൾക്കായി ഉപയോഗിച്ചിരുന്ന ഇടമാണിതെന്ന് ഇസ്രായേൽ സൈന്യം പറഞ്ഞു.
തുരങ്കത്തിന്റെ വീഡിയോയും ഇസ്രായേൽ സൈന്യം പങ്കുവച്ചിട്ടുണ്ട്.

രഹസ്യതുരങ്കത്തിൽ പടിക്കെട്ടുകൾ ഉൾപ്പെടെയുണ്ട്. ഒരാൾക്ക് മാത്രം നടന്നുപോകാനുളള വീതിയിലാണ് വഴി. പ്രത്യേകം നിർമ്മിച്ച മുറികളും ആയുധങ്ങളും ഉപകരണങ്ങളും ഇവിടെ കണ്ടെത്തിയതായി ഇസ്രായേൽ സൈന്യം അറിയിച്ചു. റസിഡൻഷ്യൽ ബിൽഡിംഗുകളുടെയും ആളുകൾ താമസിക്കുന്നതിന്റെയും ഇടയിലായിരുന്നു തുരങ്കം. അകത്തേക്ക് കയറുന്ന ഭാഗത്ത് മണ്ണ് മാറ്റിയിട്ടിരുന്ന നിലയിലാണ്. ഒരാൾക്ക് കുനിഞ്ഞ് അകത്ത് കയറാം. പിന്നെ അനായാസം നടന്നു പോകാവുന്ന തരത്തിലാണ് നിർമ്മാണം.

ഹമാസ് ബന്ദികളാക്കിയ ഇസ്രായേലികളെ മോചിപ്പിക്കാനും ഹമാസിനെ തകർക്കാനും ലക്ഷ്യമിട്ടാണ് ഗാസയിൽ ആക്രമണം ശക്തമാക്കിയതെന്നും ഇസ്രായേൽ സൈന്യം വ്യക്തമാക്കി. 2023 ഒക്ടോബർ ഏഴിന് തുടങ്ങിയ പോരാട്ടം ഗാസയിൽ ഇപ്പോഴും തുടരുകയാണ്.