മാദ്ധ്യമപ്രവർത്തനത്തിന്റെ മറവിൽ ഹമാസ് ഭീകരത; അൽ ജസീറ റിപ്പോർട്ടറെ വകവരുത്തിയതായി ഇസ്രായേൽ സൈന്യം

ഗാസയിൽ ഇസ്രായേൽ സൈന്യം നടത്തിയ വ്യോമാക്രമണത്തിൽ അന്താരാഷ്ട്ര മാദ്ധ്യമമായ അൽ ജസീറയുടെ റിപ്പോർട്ടർ അഹമ്മദ് വിഷാ കൊല്ലപ്പെട്ടതായി ഇസ്രായേൽ ഡിഫൻസ് ഫോഴ്സ് (IDF) സ്ഥിരീകരിച്ചു.

എന്നാൽ ഇയാൾ വെറുമൊരു മാദ്ധ്യമപ്രവർത്തകൻ ആയിരുന്നില്ലെന്നും, മറിച്ച് മാദ്ധ്യമപ്രവർത്തനത്തിന്റെ മറവിൽ പ്രവർത്തിച്ചിരുന്ന സജീവ ഹമാസ് ഭീകരനായിരുന്നുവെന്നും ഇസ്രായേൽ സൈനിക വക്താവ് ഔദ്യോഗികമായി വ്യക്തമാക്കി. സാധാരണക്കാരായ ജനങ്ങളെയും അന്താരാഷ്ട്ര സ്ഥാപനങ്ങളെയും തങ്ങളുടെ ക്രൂരമായ അജണ്ടകൾക്കായി ഹമാസ് എങ്ങനെ കരുവാക്കുന്നു എന്നതിന്റെ വ്യക്തമായ തെളിവാണ് ഇതെന്നും സൈന്യം ചൂണ്ടിക്കാണിക്കുന്നു.

ഗാസയിലെ ജനവാസ മേഖലകളെയും മാദ്ധ്യമ സ്ഥാപനങ്ങളെയും പോലും ഒളിത്താവളങ്ങളാക്കി മാറ്റി അന്താരാഷ്ട്ര സമൂഹത്തെ തെറ്റിദ്ധരിപ്പിക്കുന്ന ഹമാസിന്റെ യുദ്ധതന്ത്രങ്ങൾക്കെതിരെ വലിയ വിമർശനങ്ങളാണ് ഉയരുന്നത്. സാധാരണക്കാരായ മാദ്ധ്യമപ്രവർത്തകരുടെ ജീവൻ അപകടത്തിലാക്കുന്ന തരത്തിൽ ഭീകരർ മാദ്ധ്യമപ്രവർത്തകരുടെ വേഷമണിയുന്നത് കടുത്ത പ്രതിഷേധങ്ങൾക്ക് കാരണമായിട്ടുണ്ട്. കൊല്ലപ്പെട്ട അഹമ്മദ് വിഷായുടെ ഹമാസ് ബന്ധത്തെക്കുറിച്ചുള്ള കൂടുതൽ വിശദാംശങ്ങളും കൃത്യമായ തെളിവുകളും അടങ്ങിയ ഔദ്യോഗിക പ്രസ്താവന ഉടൻ തന്നെ പുറത്തുവിടുമെന്ന് ഇസ്രായേൽ സൈന്യം അറിയിച്ചു.

നിഷ്കളങ്കരായ ഗാസാനിവാസികളെ മനുഷ്യകവചമാക്കുന്നതിനൊപ്പം, മാദ്ധ്യമപ്രവർത്തനത്തിന്റെ വിശുദ്ധിയെപ്പോലും തങ്ങളുടെ ഭീകരപ്രവർത്തനങ്ങൾക്ക് മറയാക്കുന്ന ഹമാസിന്റെ ക്രൂരമായ നടപടികൾ ആഗോളതലത്തിൽ വീണ്ടും വലിയ ചർച്ചകൾക്ക് വഴിതുറന്നിരിക്കുകയാണ്.