ഏറ്റുമാനൂർ മഹാദേവ ക്ഷേത്രത്തിൽ ഏഴരപ്പൊന്നാനയ്ക്കിടെ ഭക്തജനങ്ങൾക്ക് നേരെ അസഭ്യവർഷം;സംഭവം ഭക്തജനങ്ങളെ സംരക്ഷിക്കേണ്ട പോലീസും ദേവസ്വം ഉദ്യോഗസ്ഥരും നോക്കി നിൽക്കെ;ഭക്തജന പ്രതിഷേധമുയരുന്നു!

ഏറ്റുമാനൂർ : ഏറ്റുമാനൂർ മഹാദേവ ക്ഷേത്രത്തിലെ ചരിത്ര പ്രസിദ്ധമായ ഏഴരപ്പൊന്നാനയ്ക്കിടെ സ്ത്രീകളും പിഞ്ചു കുട്ടികളുമടങ്ങുന്ന ഭക്തജനങ്ങൾക്കു നേരെ യാതൊരു ക്ഷേത്രാധികാരവും ഇല്ലാത്ത ആളുകളുടെ മോശം പെരുമാറ്റം വൻ പ്രതിഷേധത്തിനിടയാക്കി. പോലീസും ദേവസ്വം ബോർഡ് ജീവനക്കാരും നോക്കി നിൽക്കുകയാണ് യാതൊരു ഔദ്യോഗിക ചുമതലയും വഹിക്കാത്ത ഒരാൾ ഭക്തജനങ്ങളെ ചീത്ത വിളിക്കുകയും ഉന്തി മാറ്റുകയും മോശമായി പെരുമാറുകയും ചെയ്യ്തത്. ദേവസ്വം ജീവനക്കാരും സുരക്ഷാ ചുമതലയുള്ള പോലീസ് ഉദ്യോഗസ്ഥനും നോക്കി നിൽക്കെയാണ് ഭക്തജനങ്ങൾക്ക് മോശം അനുഭവമുണ്ടായത്. തിരക്ക് നിയന്ത്രിക്കാനായി നിരത്തിയ ഗ്രില്ലിന്റെ മുന്നിൽ നിന്നും ഇയാൾ ഭക്തജനങ്ങളെ ഒരു പ്രകോപനവുമില്ലാതെ ഉന്തി താഴയിടുകയും ചീത്തവിളിക്കുകയും ചെയ്തു. പോലീസിന്റെയും മറ്റ് മൗനത്തിൽ ഗതികെട്ട ഒരു പെൺകുട്ടിയും യുവാവും ശബ്ദമുയർത്തിയതോടെ ഭക്തജനങ്ങൾ സംഘടിച്ച് ഇയാൾക്കെതിരെ പ്രതികരിച്ചു. ഈ പ്രതിഷേധത്തിനൊടുവിലാണ് കൂടുതൽ പോലീസുകാർ സ്ഥലത്തെത്തുന്നതും ഇയാളെ അവിടെനിന്നും മാറ്റുന്നതും. എന്നാൽ മറ്റൊരു ഭാഗത്തേക്ക് പോയ ഇയാൾ ഇതേ പ്രവർത്തി തന്നെ ആവർത്തിക്കുകയാണ്. ഇയാൾ ആരാണ് എന്നതിലും ആരാണ് ഇയാൾക്ക് ഇതിനുള്ള അധികാരം നൽകിയതെന്നതിലും വ്യക്തതയില്ല. അമ്പലപ്പറമ്പിൽ കുപ്പിവെള്ളം വിൽക്കാനെത്തിയാണ് ഇയാൾ എന്ന് പറഞ്ഞു കേൾക്കുന്നു.

ഭക്തജനങ്ങൾ ഉണ്ടെങ്കിൽ മാത്രമേ ക്ഷേത്രങ്ങൾക്ക് നിലനിൽപ്പുള്ളൂ. ഭക്തജനങ്ങൾ ദേവന് സമർപ്പിക്കുന്ന കാണിക്ക മാത്രം പോക്കറ്റിലാക്കാൻ മാത്രമാണ് ദേവസ്വം ബോർഡ് ശ്രമിക്കുന്നത് എന്ന ആരോപണങ്ങൾ നേരത്തെ തന്നെ ഉയർന്നതാണ്. മൃഗങ്ങൾ ആക്രമിക്കപ്പെട്ടാൽ പോലും പ്രതിഷേധിക്കാൻ ആളുള്ള നാട്ടിൽ ഭക്തജനങ്ങൾ ആക്രമിക്കപ്പെട്ടാൽ അതിനെ എതിർക്കാൻ ആരുമില്ലാത്ത അവസ്ഥയാണ്. അത് തടയേണ്ട പോലീസും ദേവസ്വം ബോർഡ് ഉദ്യോഗസ്ഥരും കണ്ണടയ്ക്കുന്നതിലൂടെ ഇത്തരം പ്രവർത്തനങ്ങൾക്ക് മൗന സമ്മതം മൂളുകയാണ്.ഭക്തർ ആക്രമിക്കപ്പെടുന്ന ഇത്തരം സംഭവങ്ങൾ തികച്ചും എതിർക്കപ്പെടേണ്ടത് തന്നെയാണ്.