സിനിമയിൽ അവസരം വാഗ്ദാനം ചെയ്ത് ഫ്ലാറ്റിലെത്തിച്ച് പീഡനം; സീരിയൽ നടിയിലേക്കും സംശയമുന നീളുന്നു!!

കോഴിക്കോട് : സിനിമയിൽ അഭിനയിക്കാൻ അവസരം വാഗ്ദാനം ചെയ്തതിനെത്തുടർന്ന് ഫ്ലാറ്റിലെത്തിയ യുവതി പീഡനത്തിനിരയായി. യുവതിയെ പ്രതികൾക്കു പരിചയപ്പെടുത്തിയ കണ്ണൂർ സ്വദേശിനിയായ സിനിമ – സീരിയൽ നടിയുടെ ഒത്താശയോടെയായിരുന്നു പീഡനമെന്നാണ് പോലീസ് സംശയിക്കുന്നത്. ഇവരിൽ നിന്ന് പൊലീസ് മൊഴിയെടുത്തു കഴിഞ്ഞു.ഫ്ലാറ്റിലെത്തിയ തന്നെ ലഹരിമരുന്നു ചേർത്ത ജൂസ് നൽകി രണ്ടു പേർ പീഡിപ്പിച്ചെന്നാണ് പരാതിക്കാരി നൽകിയ മൊഴി. അതെ സമയം കേസുമായി ബന്ധപ്പെട്ട് നടിയെ വീണ്ടും ചോദ്യം ചെയ്യുമെന്ന് പോലീസ് വൃത്തങ്ങൾ അറിയിച്ചു.

കോട്ടയം സ്വദേശിനിയായ ഇരുപത്തിനാലുകാരിയാണ് നടക്കാവ് പൊലീസിൽ പരാതി നൽകിയിരിക്കുന്നത്. നടി നൽകിയ സൂചനകൾ പ്രകാരം മലപ്പുറം ജില്ലയിലെ തിരൂരങ്ങാടി, പരപ്പനങ്ങാടി സ്വദേശികളായ യുവാക്കളാണ് പ്രതികളെന്നാണ് പൊലീസ് കരുതുന്നത്. ഇവർക്കായി പോലീസ് തിരച്ചിൽ തുടരുകയാണ്.

ഈ മാസം നാലിനാണ് സംഭവം നടക്കുന്നത്. സിനിമ – സീരിയൽ നടിയെ പരിചയപ്പെട്ട യുവതി ആദ്യം കോട്ടയത്തുനിന്ന് ആദ്യം കണ്ണൂരിലെത്തുകയായിരുന്നു. കോഴിക്കോട്ടെ നിർമാതാവിനെ കണ്ടാൽ സിനിമയിൽ അവസരം ലഭിക്കുമെന്ന് നടി യുവതിയെ പറഞ്ഞു വിശ്വസിപ്പിക്കുകയും തുടർന്ന് ഇരുവരും കോഴിക്കോടെത്തുകയുമായിരുന്നു. തുടർന്ന് കാരപ്പറമ്പിലെ ഫ്ലാറ്റിലെത്തിച്ച് പീഡിപ്പിച്ചെന്നാണ് യുവതി പോലീസിൽ നൽകിയിരിക്കുന്ന മൊഴി.

സിനിമാ പ്രവർത്തകരെന്നു അവകാശപ്പെട്ടാണ് ഫ്ലാറ്റിലുണ്ടായിരുന്ന രണ്ടു പേർ യുവതിയെ സമീപിക്കുന്നത് അവിടെവച്ച് ലഹരി കലർത്തിയ ജൂസ് ബലം പ്രയോഗിച്ച് കുടിപ്പിച്ച ശേഷം യുവതിയെ പീഡനത്തിനിരയാക്കുകയായിരുന്നു. അതുവരെ കൂടെയുണ്ടായിരുന്ന നടിയെ പിന്നീട് കാണാതായെന്നും പരാതിയിലുണ്ട്. അതിനാൽത്തന്നെ ഈ നടിയുടെ സമ്മതത്തോടെയാണ് പീഡനം നടന്നതെന്ന സംശയത്തിലാണ് പൊലീസ്. എന്നാൽ ഇക്കാര്യം സ്ഥിരീകരിച്ചിട്ടില്ല. പീഡനം നടന്നതായി പറയുന്ന ഫ്ലാറ്റിലെ സിസിടിവി ദൃശ്യങ്ങൾ അന്വേഷണ സംഘം ശേഖരിച്ചു.