“ആരോടും ഒന്നും പറയാതെ കാരവാനിൽ നിന്നിറങ്ങി പോയി ! ഉണ്ടായത് ഒരു കോടി രൂപയുടെ നഷ്ടം !”- നടൻ പ്രകാശ് രാജിനെതിരെ ഗുരുതരാരോപണവുമായി നിർമ്മാതാവ്

നടന്‍ പ്രകാശ് രാജിനെതിരെ ഗുരുതര ആരോപണവുമായി തമിഴ് സിനിമാ നിര്‍മാതാവ് എസ്. വിനോദ് കുമാർ. താൻ നിര്‍മിച്ച സിനിമയിൽ അഭിനയിക്കുന്നതിനിടെ ആരോടും ഒന്നും പറയാതെ പ്രകാശ് രാജ് കാരവനില്‍ നിന്നിറങ്ങിപ്പോയെന്നും ഇത് കാരണം തനിക്ക് ഒരു കോടി രൂപയുടെ നഷ്ടമുണ്ടായെന്നുമാണ് വിനോദ് കുമാറിന്റെ ആരോപണം. സെറ്റില്‍ നിന്നുള്ള ഇറങ്ങിപ്പോക്കിനെ കുറിച്ച് പിന്നീട് തന്നോട് സംസാരിക്കാമെന്ന് പറഞ്ഞുവെങ്കിലും പ്രകാശ്​രാജ് വിളിക്കുകയോ സംസാരിക്കുകയോ ചെയ്തില്ലെന്നും വിനോദ് കുമാർ എക്സിൽ കുറിച്ചു.

തമിഴ്‌നാട് മുഖ്യമന്ത്രി എം കെ സ്റ്റാലിനും ഉപമുഖ്യമന്ത്രിയും മകനുമായ ഉദനിധി സ്റ്റാലിനുമൊപ്പമുള്ള ചിത്രം ‘ഉപമുഖ്യമന്ത്രിക്കൊപ്പം.. ജസ്റ്റ് ആസ്കിങ്’ എന്ന ഹാഷ്ടാഗോടെ പ്രകാശ്​രാജ് എക്സില്‍ പങ്കുവച്ചിരുന്നു. ഇതിന് താഴെയാണ് വിനോദ്കുമാറിന്‍റെ കമന്‍റ്.

‘നിങ്ങള്‍ക്കൊപ്പമുള്ള രണ്ടുപേരും തെരഞ്ഞെടുപ്പില്‍ ജയിച്ചവരാണ്. പക്ഷേ നിങ്ങള്‍ക്ക് കെട്ടിവച്ച കാശുപോലും നഷ്ടപ്പെട്ടു. അതാണ് വ്യത്യാസം. ഒരു മനുഷ്യനോടും ഒന്നും മിണ്ടാതെ നിങ്ങള്‍ എന്‍റെ സെറ്റില്‍ നിന്ന് ഇറങ്ങിപ്പോയത് കൊണ്ട് എനിക്കുണ്ടായ നഷ്ടം ഒരു കോടി രൂപയാണ്. എന്തായിരുന്നു അതിന് കാരണം? ചോദിച്ചെന്നേയുള്ളൂ.. എന്നെ വിളിക്കുമെന്ന് നിങ്ങള്‍ പറഞ്ഞിരുന്നു. പക്ഷേ വിളിച്ചതുമില്ല’.. എന്നായിരുന്നു ട്വീറ്റ്.

വിനോദ് കുമാറിന്റെ ആരോപണത്തിൽ പ്രകാശ്​രാജ് ഇതുവരെയും പ്രതികരിച്ചിട്ടില്ല .ജൂനിയര്‍ എന്‍ടിആറിന്‍റെ സൂപ്പര്‍ഹിറ്റ് ചിത്രം ദേവരയിലാണ് പ്രകാശ്​രാജ് ഏറ്റവുമൊടുവിലായി പ്രത്യക്ഷപ്പെട്ടത്. രാം ചരണിന്‍റെ ‘ഗെയിം ചെയിഞ്ചര്‍’, സൂര്യയുടെ ‘കങ്കുവ’, വിജയിയുടെ ’69’ എന്നിവയാണ് താരത്തിന്‍റേതായി ഇനി പുറത്തിറങ്ങാനുള്ള ചിത്രങ്ങള്‍.

സ്വന്തമായി രാഷ്ട്രീയ പാര്‍ട്ടി രൂപീകരിച്ച പ്രകാശ് രാജ് 2019 ലെ തിരഞ്ഞെടുപ്പില്‍ മല്‍സരിച്ചുവെങ്കിലും വലിയ തോല്‍വിയാണ് നേരിട്ടത്. കെട്ടിവച്ച കാശ് വരെ അദ്ദേഹത്തിന് നഷ്ടമായിരുന്നു.