ഭാര്യയെ സബ് ഇൻസ്പെക്ടറാക്കാൻ സമ്പാദ്യം മുഴുവൻ ചെലവാക്കി ! ഒടുവിൽ പദവിയിലെത്തിയപ്പോൾ ഭർത്താവായ ക്ഷേത്രപൂജാരിയുടെ ജോലിയിലും വസ്ത്രത്തിലും ലജ്ജ ! വിവാഹ മോചന ഹർജി നൽകി യുവതി

തന്റെ സമ്പാദ്യമെല്ലാം ചെലവാക്കി പഠിപ്പിച്ച് പദവിയിൽ എത്തിച്ച ക്ഷേത്ര പൂജാരിയായ ഭർത്താവിനെതിരെ വിവാഹ മോചന ഹർജി നൽകി സബ് ഇൻസ്പെക്ടറായ ഭാര്യ. പൂജാരിയുടെ വസ്ത്രധാരണത്തിലും തൊഴിലിലും ലജ്ജ തോന്നുന്നുവെന്ന് വാദിച്ചാണ് ഭാര്യയുടെ നീക്കം. ഭോപ്പാലിലെ കുടുംബ കോടതിയിലാണ് വിചിത്രമായ കേസ് റിപ്പോർട്ട് ചെയ്തിരിക്കുന്നത്. വിവാഹശേഷം മൂന്ന് നാല് വർഷക്കാലം സന്തോഷത്തോടെ ജീവിച്ച ദമ്പതികൾക്കിടയിൽ ഭാര്യയുടെ കരിയറിലുണ്ടായ മാറ്റമാണ് അസ്വാരസ്യങ്ങൾക്ക് തുടക്കമിട്ടത്.

ഭാര്യയുടെ ആഗ്രഹം സഫലമാക്കാൻ തന്റെ പൂജാവൃത്തിയിലൂടെ ലഭിച്ചിരുന്ന വരുമാനം മുഴുവൻ അവർക്കായി പൂജാരി മാറ്റിവെച്ചു. അവരുടെ വിദ്യാഭ്യാസം, കോച്ചിംഗ്, പരീക്ഷാ തയ്യാറെടുപ്പുകൾ എന്നിവയ്‌ക്കെല്ലാം പൂർണ്ണ പിന്തുണ നൽകി. എന്നാൽ പരിശീലനം പൂർത്തിയാക്കി ഭാര്യ സബ് ഇൻസ്പെക്ടറായി ജോലിയിൽ പ്രവേശിച്ചതോടെ ഭർത്താവിന്റെ പരമ്പരാഗത വസ്ത്രധാരണവും പൂജാരി എന്ന നിലയിലുള്ള ജീവിതരീതിയും തന്റെ സാമൂഹിക അന്തസ്സിന് ചേരാത്തതാണെന്ന് അവർ വാദിക്കാൻ തുടങ്ങി.

ഭർത്താവ് ധരിക്കുന്ന ധോത്തിയും കുർത്തയും നീട്ടി വളർത്തിയ ശിഖയും മാറ്റണമെന്ന് അവർ കർശനമായി ആവശ്യപ്പെട്ടു. പോലീസ് ഓഫീസർ എന്ന നിലയിലുള്ള തന്റെ പ്രൊഫഷണൽ ജീവിതത്തിന് ഭർത്താവിന്റെ ഈ വേഷം വലിയ നാണക്കേടുണ്ടാക്കുന്നു എന്നാണ് അവരുടെ പക്ഷം. എന്നാൽ തന്റെ വിശ്വാസത്തിന്റെയും തൊഴിലിന്റെയും ഭാഗമായ ഈ വസ്ത്രധാരണം തന്റെ വ്യക്തിത്വത്തിന്റെ ഭാഗമാണെന്ന് ഭർത്താവ് നിലപാടെടുത്തു. തന്റെ സ്വത്വത്തിൽ മാറ്റം വരുത്താൻ അദ്ദേഹം തയ്യാറാകാത്തതിനെത്തുടർന്നാണ് ഭാര്യ കോടതിയിൽ വിവാഹമോചന ഹർജി സമർപ്പിച്ചത്.

കുടുംബകോടതിയുടെ നേതൃത്വത്തിൽ നടന്ന നിരവധി കൗൺസിലിംഗ് സെഷനുകളിലും ഭാര്യ തന്റെ നിലപാടിൽ ഉറച്ചുനിൽക്കുകയായിരുന്നു. പങ്കാളികളിൽ ഒരാളുടെ സാമൂഹിക പദവിയിലുണ്ടാകുന്ന പെട്ടെന്നുള്ള മാറ്റം പലപ്പോഴും ഇത്തരം ജീവിതശൈലീ തർക്കങ്ങളിലേക്ക് നയിക്കാറുണ്ടെന്ന് ഫാമിലി കൗൺസിലർ ശൈൽ അശ്വതി പറഞ്ഞു.