കരൂർ ദുരന്തം! തങ്ങൾ ഉത്തരവാദികളല്ലെന്ന് സിബിഐ ചോദ്യം ചെയ്യലിൽ വിജയ്; ചോദ്യം ചെയ്യൽ നീണ്ടത് ആറ് മണിക്കൂർ

തമിഴ്നാട്ടിലെ കരൂരിൽ കഴിഞ്ഞ വർഷം സെപ്റ്റംബറിൽ നടന്ന രാഷ്ട്രീയ റാലിക്കിടെയുണ്ടായ തിക്കിലും തിരക്കിലും പെട്ട് 41 പേർ മരിച്ച സംഭവത്തിൽ തമിഴക വെട്രി കഴകം (ടിവികെ) അദ്ധ്യക്ഷനും നടനുമായ വിജയ്‌യെ സിബിഐ ചോദ്യം ചെയ്തു. ദില്ലിയിലെ സിബിഐ ആസ്ഥാനത്ത് നടന്ന ചോദ്യം ചെയ്യൽ ഏകദേശം ആറ് മണിക്കൂറോളം നീണ്ടുനിന്നു. ചോദ്യം ചെയ്യലിന് ശേഷം പുറത്തിറങ്ങിയ വിജയ്, ദുരന്തത്തിന്റെ ഉത്തരവാദിത്തം തന്റെ പാർട്ടിക്കല്ലെന്ന് അന്വേഷണ ഏജൻസിയോട് വ്യക്തമാക്കിയതായാണ് വിവരം. വലിയൊരു ദുരന്തം ഒഴിവാക്കാനാണ് താൻ സംഭവസ്ഥലത്ത് നിന്നും നേരത്തെ മടങ്ങിയതെന്ന് അദ്ദേഹം മൊഴി നൽകിയതായി പാർട്ടി വൃത്തങ്ങൾ അറിയിച്ചു.

കഴിഞ്ഞ സെപ്റ്റംബർ 27-ന് കരൂരിൽ നടന്ന ടിവികെയുടെ രാഷ്ട്രീയ റാലിക്കിടെയാണ് തമിഴ്നാട് കണ്ട ഏറ്റവും വലിയ ജനക്കൂട്ട ദുരന്തങ്ങളിലൊന്ന് നടന്നത്. സംഭവത്തിൽ വിജയ്‌യുടെ മൊഴികൾ പോലീസ് റിപ്പോർട്ടുകളുമായി ഒത്തുനോക്കുമെന്ന് സിബിഐ ഉദ്യോഗസ്ഥർ അറിയിച്ചു. വിജയ് എത്തുന്നതിലുണ്ടായ കാലതാമസമാണ് ജനക്കൂട്ടത്തെ നിയന്ത്രണാതീതമാക്കിയതെന്നായിരുന്നു തമിഴ്നാട് പോലീസിന്റെ ആരോപണം. എന്നാൽ ഇത് ഭരണകക്ഷിയായ ഡിഎംകെയുടെ ഗൂഢാലോചനയാണെന്നും കൃത്യമായ സുരക്ഷാ ക്രമീകരണങ്ങൾ ഒരുക്കുന്നതിൽ പോലീസ് പരാജയപ്പെട്ടുവെന്നുമാണ് വിജയ് തിരിച്ചടിച്ചത്. കേസുമായി ബന്ധപ്പെട്ട് വിജയ്‌യെ വീണ്ടും ചോദ്യം ചെയ്യാൻ വിളിപ്പിക്കാൻ സാധ്യതയുണ്ടെന്നും ഉദ്യോഗസ്ഥർ സൂചിപ്പിച്ചു.