തിരുവനന്തപുരം ജില്ലയിൽ കനത്ത മഴ ; പേപ്പാറ, അരുവിക്കര ഡാമുകളുടെ ഷട്ടറുകൾ ഇന്ന് ഉയർത്തും, നദീതീരങ്ങളിലുള്ളവർ ജാഗ്രത പുലർത്തണം

തിരുവനന്തപുരം:മലയോര മേഖലകളിൽ പെയ്യുന്ന ശക്തമായ മഴയെത്തുടർന്ന് ജലനിരപ്പ് ഉയർന്ന സാഹചര്യത്തിൽ തിരുവനന്തപുരം ജില്ലയിലെ പ്രധാന അണക്കെട്ടുകളായ പേപ്പാറ, അരുവിക്കര ഡാമുകളുടെ ഷട്ടറുകൾ ഇന്ന് വൈകിട്ടോടെ കൂടുതൽ ഉയർത്തുമെന്ന് ജില്ലാ കളക്ടർ അനു കുമാരി അറിയിച്ചു. ഡാമുകളിലേക്കുള്ള നീരൊഴുക്ക് ശക്തമായതിനാലാണ് സുരക്ഷ മുൻനിർത്തി ജലം പുറത്തേക്ക് വിടാൻ അധികൃതർ തീരുമാനിച്ചത്. അണക്കെട്ടുകളുടെ തീരത്തുള്ളവരും കരമനയാറിന്റെ ഇരുവശങ്ങളിൽ താമസിക്കുന്നവരും അതീവ ജാഗ്രത പുലർത്തണമെന്ന് ഭരണകൂടം കർശന നിർദ്ദേശം നൽകിയിട്ടുണ്ട്.

പേപ്പാറ ഡാമിന്റെ സുരക്ഷിത ജലനിരപ്പ് 106.5 മീറ്ററിൽ നിലനിർത്തേണ്ടതുണ്ട്. ഇതിനായി ഡാമിന്റെ ഒന്നു മുതൽ നാല് വരെയുള്ള ഷട്ടറുകൾ ഇന്ന് വൈകിട്ട് നാല് മണിക്ക് 10 സെന്റിമീറ്റർ വീതം ആകെ 40 സെന്റിമീറ്റർ ഉയർത്താനാണ് നിശ്ചയിച്ചിരിക്കുന്നത്. ഇതേത്തുടർന്ന് അരുവിക്കര അണക്കെട്ടിലേക്കുള്ള ജലപ്രവാഹം വർദ്ധിക്കുമെന്നതിനാലാണ് അവിടെയും നിയന്ത്രണങ്ങൾ ഏർപ്പെടുത്തുന്നത്. അരുവിക്കര ഡാമിലെ ജലനിരപ്പും ക്രമാതീതമായി ഉയരുന്നതിനാൽ ഇന്ന് വൈകിട്ട് 5.30ന് രണ്ട് മുതൽ അഞ്ച് വരെയുള്ള ഷട്ടറുകൾ 10 സെന്റിമീറ്റർ വീതം കൂടുതൽ ഉയർത്തും. കഴിഞ്ഞ ദിവസങ്ങളിൽ ഉയർത്തിയ 40 സെന്റിമീറ്റർ ഉൾപ്പെടെ ആകെ 80 സെന്റിമീറ്ററായിരിക്കും അരുവിക്കരയിൽ ഷട്ടറുകൾ ഉയർത്തുക.

അണക്കെട്ടുകൾ തുറക്കുന്നതോടെ നദികളിൽ ഒഴുക്ക് വർദ്ധിക്കാനും ജലനിരപ്പ് പെട്ടെന്ന് ഉയരാനും സാധ്യതയുണ്ട്. അതിനാൽ പേപ്പാറ, അരുവിക്കര ഡാമുകളുടെ സമീപപ്രദേശങ്ങളിൽ താമസിക്കുന്നവരും നദീതീരങ്ങളിലുള്ളവരും യാതൊരു കാരണവശാലും ജലാശയങ്ങളിൽ ഇറങ്ങരുതെന്നും സുരക്ഷിത സ്ഥാനങ്ങളിലേക്ക് മാറണമെന്നും ജില്ലാ കളക്ടർ അറിയിച്ചു. റവന്യൂ, പോലീസ്, ദുരന്തനിവാരണ സേനകൾ സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണ്.