മൃതദേഹങ്ങൾക്ക് സമുദായമില്ല…! പൊതു ശ്മശാനങ്ങളില്‍ സമുദായ വേര്‍തിരിവ് നടത്തരുത്;എല്ലാവരുടെയും ഭൗതിക ശരീരം അടക്കം ചെയ്യണം, സുപ്രധാന പ്രഖ്യാപനവുമായി ഹൈക്കോടതി

കൊച്ചി: പൊതു ശ്മശാനങ്ങളില്‍ സമുദായ വേര്‍തിരിവ് ഇല്ലാതെതന്നെ എല്ലാവരുടെയും മൃതദേഹം അടക്കം ചെയ്യണമെന്ന് വ്യക്തമാക്കി ഹൈക്കോടതി.പാലക്കാട് പുത്തൂര്‍ പഞ്ചായത്തിലെ ശ്മശാനത്തില്‍ ചക്കിലിയന്‍ സമുദായത്തിൽ പെട്ട ആളുകൾക്ക് മൃതദേഹം അടക്കം ചെയ്യാനുള്ള അനുമതി നൽകുന്നില്ലെന്ന് ചൂണ്ടിക്കാട്ടി നല്‍കിയ ഹര്‍ജിയിലാണ് ഹൈക്കോടതി സുപ്രാധാന പ്രഖ്യാപനം നടത്തിയത്. 2020 ഏപ്രിലില്‍ ചക്കിലിയന്‍ സമുദായത്തില്‍ പെട്ട സ്ത്രീയുടെ മൃതദേഹം പുത്തൂര്‍ പഞ്ചായത്തിലെ ശ്മശാനത്തില്‍ സംസ്‌കരിച്ചില്ലെന്ന് ചൂണ്ടിക്കാട്ടിയാണ് കേസ് കോടതിയിലെത്തിയത്.മൃതദേഹവുമായി എത്തിയ കുടുംബാംഗങ്ങളെയും സമുദായ അംഗങ്ങളെയും മേല്‍ജാതിക്കാര്‍ ഭീഷണിപ്പെടുത്തിയതായും ഹര്‍ജിയില്‍ പറഞ്ഞു.

എന്നാല്‍ ഹര്‍ജിയില്‍ പരാമര്‍ശിക്കുന്ന ശ്മശാനം സ്വകാര്യ ഉടമസ്ഥതയില്‍ ഉള്ളതാണെന്ന് ജില്ലാ കലക്ടര്‍ കോടതിയെ അറിയിച്ചു. കോവിഡ് ഭീതി നിലനിന്ന കാലം ആയതിനാലാണ് സ്ത്രീയുടെ മൃതദേഹം അവിടെ അടക്കാതിരുന്നത്. മറ്റൊരു സ്ഥലം കണ്ടെത്തി ഈ പ്രശ്‌നം പരിഹരിച്ചതാണെന്നും കലക്ടര്‍ അറിയിച്ചു.
ഒറ്റ സംഭവം മാത്രം വച്ച് ജാതി വേര്‍തിരിവ് നിലനില്‍ക്കുന്നുവെന്ന നിഗമനത്തില്‍ എത്താനാവില്ലെന്ന് കോടതി പറഞ്ഞു. മഹാമാരിക്കാലത്ത് കോവിഡ് ഭീതി ഉയര്‍ത്തി പ്രദേശ വാസികള്‍ എതിര്‍പ്പ് അറിയിച്ചത് തീര്‍ത്തും തള്ളിക്കളയാനാവില്ലെന്നും കോടതി അഭിപ്രായപ്പെട്ടു. വിശദമായ നിരീക്ഷണത്തിന് ശേഷം അറിയിപ്പ് ഉണ്ടാകുമെന്ന് കോടതി വ്യക്തമാക്കി.