‘ഒരുമിക്കാം ധർമ്മരക്ഷക്കായ് പോരാടാം സാമൂഹ്യനീതിക്കായ്’ ഹിന്ദു ഐക്യവേദിയുടെ സംസ്ഥാന സമ്മേളനത്തിന് ഉജ്ജ്വല തുടക്കം

തൃശ്ശൂർ: ഹിന്ദു ഐക്യവേദിയുടെ സംസ്ഥാന സമ്മേളനത്തിന് സാംസ്‌കാരിക നഗരിയായ തൃശ്ശൂരിൽ പ്രൗഢഗംഭീര തുടക്കം. ‘ഒരുമിക്കാം ധർമ്മരക്ഷക്കായി പോരാടാം സാമൂഹികനീതിക്കായി’ എന്നതാണ് ഇക്കൊല്ലത്തെ സമ്മേളന സന്ദേശം. വർത്തമാനകാല ഹിന്ദു നേരിടുന്ന വെല്ലുവിളികളും സംഘടനയുടെ സമരാത്മക ഇടപെടലുകളും സംബന്ധിച്ച വിശദമായ ചർച്ചകൾ സമ്മേളനത്തിലുണ്ടാകും. വടക്കുംനാഥ ക്ഷേത്രമൈതാനിയിൽ ഒരുക്കിയിരിക്കുന്ന വിശാലമായ പന്തലിലാണ് പ്രതിനിധി സമ്മേളനം നടക്കുക. ഞായറാഴ്ച വൈകുന്നേരം 05 ന് പ്രകടനവും പൊതുസമ്മേളനവും നടക്കും. മുതിർന്ന സംഘപ്രചാരകനും പ്രജ്ഞാ പ്രവാഹ്‌ ദേശീയ സംയോജകനുമായ ജെ നന്ദകുമാർ പൊതുസമ്മേളനം ഉദ്‌ഘാടനം ചെയ്യും. സംസ്ഥാന അദ്ധ്യക്ഷ കെ പി ശശികല, വർക്കിങ് പ്രസിഡന്റ് വത്സൻ തില്ലങ്കേരി എന്നിവർ സമ്മേളനത്തിൽ പ്രസംഗിക്കും.

സമ്മേളനത്തിന്റെ ഭാഗമായുള്ള ഹിന്ദു നേതൃസമ്മേളനം സ്വാമി ചിദാനന്ദപുരി ഉദ്‌ഘാടനം ചെയ്‌തു. കെ പി ശശികല അദ്ധ്യക്ഷത വഹിക്കുന്ന സമ്മേളനത്തിൽ ‘സാമ്പത്തിക ശാക്തീകരണം ഹിന്ദു സമൂഹത്തിൽ’ എന്ന വിഷയത്തിൽ ചർച്ചകൾ നടന്നു. നാളത്തെ പ്രതിനിധി സമ്മേളനത്തിന്റെ ഉദ്‌ഘാടനം ഹിന്ദു ജാഗരൺ മഞ്ച് ക്ഷേത്രീയ സംഘടനാ സെക്രട്ടറി ജഗദീഷ് കാന്ത് നിർവ്വഹിക്കും. സംസ്ഥാന വർക്കിങ് പ്രസിഡന്റ് വത്സൻ തില്ലങ്കേരി അദ്ധ്യക്ഷനായിരിക്കും. പുതിയ ഭാരവാഹികളെ നാളെ തെരഞ്ഞെടുക്കും. നാളത്തെ സമാരോപിൽ രാഷ്ട്രീയ സ്വയംസേവക് സംഘ് പ്രാന്തപ്രചാരക് എസ് സുദർശൻ സംസാരിക്കും. ഞായറാഴ്ചത്തെ പ്രതിനിധി സമ്മേളനത്തിന്റെ ഉദ്‌ഘാടനം ആർ എസ് എസ് അഖിലഭാരതീയ കാര്യകാരി സദസ്യൻ രാം മാധവ് ആണ് ഉദ്‌ഘാടനം ചെയ്യുക. സമാപന സഭയിൽ ബിജെപി നേതാവ് കുമ്മനം രാജശേഖരൻ സംസാരിക്കും.

പതിനായിരത്തിലധികം പ്രതിനിധികളാണ് സംസ്ഥാന സമ്മേളനത്തിൽ പങ്കെടുക്കുന്നത്. സമ്മേളന നഗരിയിൽ പ്രതിനിധികൾക്കായി വിപുലമായ സൗകര്യങ്ങൾ ഏർപ്പെടുത്തിയിട്ടുണ്ട്. എല്ലാ പ്രതിനിധികൾക്കും ഉച്ചയൂണിന് വിളമ്പുക ജില്ലയിലെ അമ്മമാർ തയ്യാറാക്കിയ പൊതിച്ചോറുകളാണ്. സമ്മേളനത്തിന്റെ ഭാഗമായി അഞ്ചു ദിവസം നീടുനിൽക്കുന്ന പ്രമുഖർ പങ്കെടുത്ത വൈചാരിക സദസ്സും നടന്നു.