ഏഴുദിവസം മുഴങ്ങിയ മന്ത്രോച്ചാരണങ്ങൾ നിശബ്ദതയ്ക്കു വഴിമാറി; യാഗാവസാനം വരുണപ്രസാദമായി ഇടിയോടുകൂടിയ മഴ! മഹാമംഗളാരതിയോടെ വിശ്വകീർത്തി നേടിയ പ്രപഞ്ചയാഗം സമംഗളമായി!

തിരുവനന്തപുരം: ചരിത്രത്തിലാദ്യമായി പൗർണ്ണമിക്കാവിൽ നടന്ന പ്രപഞ്ചയാഗം സമംഗളം സമാപിച്ചു. ഏഴുദിവസം മുഴങ്ങിയ മന്ത്രോച്ചാരണങ്ങൾ നിശബ്ദതയ്ക്കു വഴിമാറി. യാഗാവസാനം വരുണപ്രസാദമായി ഇടിയോടുകൂടിയ മഴ യാഗഭൂമിയിലേയ്ക്ക് പെയ്‌തിറങ്ങി. ഭക്തമാനസങ്ങൾക്ക് ജന്മസായൂജ്യവും തികഞ്ഞ സംതൃപ്തിയും. പൗർണ്ണമിയിലെ നിറനിലാവ് നിറഞ്ഞാടിയ പൗർണ്ണമിക്കാവിലെ സംഘാടകരെ പോലും വിസ്മയിപ്പിക്കുന്ന തരത്തിലുള്ള തിരക്കാണ് പ്രപഞ്ചയാഗത്തിൽ അനുഭവപ്പെട്ടത്.

പഞ്ചഭൂതങ്ങളെ പ്രതിനിധീകരിക്കുന്ന അഞ്ച് യാഗകുണ്ഡങ്ങളിലാണ് ഒരേ സമയം മന്ത്രോച്ചാരണങ്ങൾ നടന്നത്.ഇന്നലെ നേപ്പാളിലെ പശുപതി നാഥ ക്ഷേത്രത്തിലെ മൂൽഭട്ടായ ഗണേഷ് ഭട്ടുൾപ്പെടെ കന്യാകുമാരി,കാശി, രാമേശ്വരം, കാളഹസ്തി, മഹാകാലേശ്വർ തുടങ്ങി മഹാക്ഷേത്രങ്ങളിലെ ആചാര്യൻമാർ യാഗശാലയിൽ പ്രപഞ്ചയാഗത്തിലെ പൂജകളിൽ പങ്കെടുത്തു.

യാഗാചാര്യനായ കൈലാസപുരി സ്വാമിയേയും മഠാധിപതിയായ സിൻഹാ ഗായത്രിയേയും കാണാനും അനുഗ്രഹം വാങ്ങാനും മണിക്കൂറുകളോളമാണ് കൈക്കുഞ്ഞുങ്ങൾ മുതൽ വൃദ്ധർ വരെ കാത്ത് നിന്നത്.ഒരടി പോലും നടക്കാൻ കഴിയാത്ത സോന എന്ന വീട്ടമ്മയും ഭർത്താവ് രോഹിത്തും കുട്ടികളായ കേശുവും കാശിയും കൈലാസപുരി സ്വാമിയെ കാണാൻ കാത്തിരുന്നത് പലർക്കും സുഖമില്ലാതെ വീട്ടിൽ ഒതുങ്ങി കൂടുന്നവരെ അമ്പലത്തിൽ കൊണ്ടുവരാൻ പ്രചോദനമായി. ഹിന്ദി സിനിമാ രംഗത്തുള്ളവർ തങ്ങളുടെ സിനിമകൾ വിജയിക്കുന്നതിനായി ആശ്രയിക്കുന്ന ബോംബെയിലെ സുവർണ്ണ ബാബയും പ്രപഞ്ചയാഗത്തിൽ ശ്രദ്ധിക്കപ്പെട്ട ആചാര്യനാണ്.ഇന്നലെ സംവിധിയകൻ ഷാജി കൈലാസും അഭിനേത്രിയും അവതാരകയുമായ ചിത്രയും യാഗശാലയിലെത്തി.

ഒരേ സമയം യാഗശാലയിലും ക്ഷേത്രത്തിനകത്തും മന്ത്രങ്ങളും പൂജകളും പുറത്ത് ലളിതാ സഹസ്രനാമം ജപവും വേദപാരായണവും കലാപരിപാടികളും പുസ്തക പ്രകാശനവും പ്രസംഗങ്ങളും നടന്നതും മറ്റൊരു അപൂർവതയായിരുന്നു. ഇന്നലെ രാത്രി നടന്ന ഗുരുസി പൂജയോടെ പ്രപഞ്ചയാഗം സമാപിച്ചു.ഇനി മേയ് അഞ്ചാം തീയതിയേ പൗർണ്ണമിക്കാവിലെ ക്ഷേത്ര നട തുറക്കൂ. യാഗത്തിൽ പങ്കെടുക്കുകയും സഹകരിക്കുകയും ചെയ്ത എല്ലാ ഭക്തരോടും പ്രപഞ്ചയാഗത്തിൻ്റെ സ്വാഗത സംഘം ചെയർമാൻ പത്മവിഭൂഷൺ ഡോ.ജി.മാധവൻ നായർ ദേവിയുടെ നാമത്തിൽ നന്ദി പറഞ്ഞു.