അയോധ്യ വിധി വരാനിരിക്കെ ഹിന്ദു നേതാവിനെ ക്രൂരമായി കൊലപ്പെടുത്തി; ലക്‌നൗ അതീവ ജാഗ്രതയിൽ

ലക്‌നൗ: ഹിന്ദു മഹാസഭ നേതാവ് കലമേഷ് തിവാരിയെ കഴുത്തു മുറിച്ച ശേഷം വെടിവച്ചു കൊലപ്പെടുത്തി. ലക്‌നൗവില്‍ സംഘടനയുടെ ഓഫിസില്‍ വച്ചാണ്കമലേഷ് തിവാരിയെ അജ്ഞാതര്‍ കൊന്നത്. ആശുപത്രിയിലേക്ക് കൊണ്ടുപോകും വഴിയായിരുന്നു അന്ത്യം. അജ്ഞാതരായ രണ്ടു പേര്‍ ത്രിപാഠിയെ ആക്രമിക്കുകയായിരുന്നെന്നാണ് വിവരം.

റിപ്പോര്‍ട്ടുകള്‍ പ്രകാരം, ഒരു സമ്മാനം കൈമാറുന്നതിന്റെ മറവില്‍ ആക്രമണകാരികള്‍ തിവാരിയുടെ ഓഫീസിലേക്ക് അതിക്രമിച്ചു കയറി. അകത്തേക്ക് കടന്നയുടനെ അക്രമികള്‍ ഹിന്ദു മഹാസഭാ നേതാവിന്റെ കഴുത്തു മുറിക്കുകയും മരണം ഉറപ്പക്കാന്‍ വെടിയുതിര്‍ക്കുകയും ചെയ്തതം. അക്രമികള്‍ സംഭവസ്ഥലത്ത് നിന്ന് ഓടി രക്ഷപ്പെടുകയുമായിരുന്നു. 2015ല്‍ മുഹമ്മദ് നബിയുമായി ബന്ധപ്പെട്ട വിവാദ പരാമര്‍ശം നടത്തിയതിന് തിവാരി ഇസ്ലാം തീവ്രഗ്രൂപ്പുകളില്‍ നിന്നു ഭീഷണി നേരിട്ടിരുന്നു.

എന്നാൽ തിവാരിക്കു മേല്‍ ചുമത്തിയ ദേശീയ സുരക്ഷാ നിയമം (എന്‍എസ്എ) അലഹബാദ് ഹൈക്കോടതിയുടെ ലക്നൗ ബെഞ്ച് അടുത്തിടെ റദ്ദാക്കിയിരുന്നു. കൂടാതെ അയോധ്യ കേസിലും ശക്തമായ നിലപാടുകൾ അറിയിച്ച വ്യക്തികൂടിയായിരുന്നു കലമേഷ് തിവാരി. ഇതിന്റെ പശ്ചാത്തലത്തിലും അദ്ദേഹം നിരവധി ഭീഷണികൾ നേരിട്ടിരുന്നു. അയോധ്യ കേസിന്റെ വിധി വരാനിരിക്കെയാണ് ഈ കൊലപാതകം എന്നതും ശ്രദ്ധേയമാണ്. അതേസമയം ഹിന്ദു മഹാസഭ നേതാവ് കൊല്ലപ്പെട്ടതിനെത്തുടര്‍ന്ന് ലക്‌നൗ അതീവ ജാഗ്രതയിലാണ്. അക്രമികള്‍ക്കായി അന്വേഷണം തുടങ്ങിയതായി പൊലീസ് അറിയിച്ചു.