ഹിന്ദു എന്നത് എല്ലാ ഭാരതീയരുടെയും സാംസ്കാരിക പൗരത്വം; ‘അഖണ്ഡ ഭാരതം’ ഉടൻ; യോഗി ആദിത്യനാഥ്‌

ലക്നൗ : ഭാരതം ഹിന്ദു രാഷ്ട്രം ആണെന്നും ‘അഖണ്ഡ ഭാരതം’ എന്ന ആശയം ഉടൻ തന്നെ പ്രാവർത്തികമാകുമെന്നും ഉത്തർപ്രദേശ് മുഖ്യമന്ത്രി യോഗി ആദിത്യനാഥ് വ്യക്തമാക്കി. ഹിന്ദു എന്നത് സാംസ്കാരിക പദം ആണെന്നും യോഗി പറഞ്ഞു. ട്വിറ്ററിൽ പങ്കുവച്ച അഭിമുഖത്തിന്റെ ദൃശ്യങ്ങളിലായിരുന്നു അദ്ദേഹത്തിന്റെ പരാമർശം.

‘‘ഹിന്ദു എന്നത് എല്ലാ ഭാരതീയരുടെയും സാംസ്കാരിക പൗരത്വമാണ്. ഹിന്ദു ഒരു മതമോ വിഭാഗമോ ആയി ചുരുങ്ങുന്നതല്ല. ഭാരതം ഒരു ഹിന്ദു രാഷ്ട്രമാണ്. ഭാരതത്തിലെ എല്ലാ പൗരന്മാരും ഹിന്ദുക്കളാണ് എന്നതാണു കാരണം. മതം, വിശ്വാസം, വിഭാഗം എന്നിവയെ ഹിന്ദു എന്ന പദവുമായി കൂട്ടിച്ചേർത്തു മനസ്സിലാക്കുന്നത് തെറ്റിദ്ധാരണയാണ്. എല്ലാ ഭാരതീയർക്കും ഭരണഘടനയോട് ഉന്നത ബഹുമാനം വേണം, അതാണു നമ്മുടെ വഴികാട്ടി’’– അദ്ദേഹം വീഡിയോയിൽ പറഞ്ഞു.

‘അഖണ്ഡ ഭാരതം’ എന്ന ആശയം ഉടൻ തന്നെ യാഥാർഥ്യമാകുമെന്നും യോഗി വ്യക്തമാക്കി. ‘‘ആധ്യാത്മിക ലോകത്തിൽ പാകിസ്ഥാൻ എന്നൊരു രാജ്യം യഥാർഥത്തിൽ ഇല്ല. യഥാർഥത്തിൽ ഇല്ലാതിരുന്നിട്ടുകൂടി ഏറെക്കാലം അതിജീവിച്ചു എന്നതുതന്നെ ഭാഗ്യമാണ്. ഭാരതവുമായി ചേരാനാണ് പാകിസ്ഥാനും ആഗ്രഹിക്കുന്നത്. അഖണ്ഡഭാരതം എന്ന യാഥാർഥ്യം ഉടനെ പ്രാവർത്തികമാകും ’’– യോഗി വ്യക്തമാക്കി.