നേന്ത്രപ്പഴം വളരെ വേഗം കേടാകുന്നുണ്ടോ? എന്നാൽ ചെയ്യേണ്ടത് ഇത്രമാത്രം

സാധാരണയായി പഴങ്ങളെല്ലാം കേടാകാതിരിക്കാനായി ഫ്രിഡ്ജില്‍ സൂക്ഷിച്ച് ഉപയോഗിക്കുന്നതാണ് പതിവ്. എന്നാൽ നേന്ത്രപ്പഴം ഇത്തരത്തിൽ ഫ്രിഡ്ജില്‍ സൂക്ഷിച്ച് ഉപയോഗിക്കാൻ കഴിയില്ല. അതിനാൽ തന്നെ സമയം കഴിഞ്ഞാല്‍ പഴം ചീത്തയായി പോകുന്ന അവസ്ഥയാണ് ഉള്ളത്.

എന്നാൽ ഇനി അങ്ങനെ പഴം കേടാക്കി കളയേണ്ടതില്ല. ഇതിനായി ഒരു വഴിയുണ്ട്. ഈ സൂത്രം പ്രയോഗിച്ച് നമുക്ക് പഴങ്ങള്‍ക്ക് പരമാവധി ആയുസ് നല്‍കാം. ഇതിന് ആകെ വേണ്ടത് പ്ലാസ്റ്റിക് റാപ് മാത്രമാണ്. സൂപ്പര്‍ മാര്‍ക്കറ്റുകളിലെല്ലാം പ്ലാസ്റ്റിക് റാപ് ഇന്ന് സുലഭമാണ്. മാത്രമല്ല വളരെ എളുപ്പത്തില്‍ ചെയ്യാവുന്നൊരു പൊടിക്കൈ ആണിത്.

ഇതിനായി ആദ്യം നേന്ത്രപ്പഴം ഓരോന്നായി ഞെട്ടിന്റെ ഭാഗം തകരാതെ അടര്‍ത്തിയെടുക്കുക. പിന്നീട് ഇതിന്റെ ഞെട്ടിന്റെ ഭാഗത്തായി പ്ലാസ്റ്റിക് റാപ് നന്നായി ചുറ്റിയെടുക്കുക. കൂടാതെ ഞെട്ടിന്റെ അഗ്രഭാഗത്ത് മാത്രമല്ല, കാമ്പ് തുടങ്ങുന്നിടം വരെ ‘കവര്‍’ ചെയ്യുന്ന തരത്തില്‍ വേണം റാപ് ചുറ്റാന്‍. ഇങ്ങനെ ചെയ്യുമ്പോള്‍ പഴത്തില്‍ നിന്ന് ജലാംശം വറ്റിപ്പോകുന്നത് തടയാനാകും. അതോടെ പഴം പെട്ടെന്ന് പഴുത്ത് കറുപ്പ് കയറുന്നത് ഒഴിവാക്കാനാകും. കൂടുതല്‍ ദിവസം പഴത്തിന് ആയുസും ലഭിക്കും.