അയ്യനെ കാണാൻ;ശബരിമലയിൽ വൻ ഭക്തജനത്തിരക്ക്,ദർശനം നടത്തിയ തീർത്ഥാടകരുടെ എണ്ണം 10 ലക്ഷം കടന്നു,സന്നിധാനം ശരണംവിളികളാൽ മുഖരിതം

പത്തനംതിട്ട :കൊവിഡ് നിയന്ത്രണങ്ങളെല്ലാം നീങ്ങിയതോടെ ശബരിമലയിൽ ലക്ഷകണക്കിന് ഭക്തജനങ്ങളാണ് തീർത്ഥാടനത്തിനായെത്തുന്നത്. പ്രതിദിനം അരലക്ഷത്തിന് മുകളിലാണ് ഭക്തർ സന്നിധാനത്തേയ്ക്ക് എത്തുന്നത്.തീർത്ഥാടകരുടെ എണ്ണം 10 ലക്ഷം കടന്നുവെന്നാണ് കണക്ക്.ഇതര സംസ്ഥാനത്ത് നിന്നാണ് ഏറ്റവും കൂടുതൽ തീർത്ഥാടകർ ശബരിമലയിൽ എത്തുന്നത്.ഭക്തജനങ്ങളുടെ സാന്നിധ്യത്തിൽ സന്നിധാനം ശരണംവിളികളാൽ മുഖരിതമാണ്.

ദേവസ്വം ബോർഡിന്റെ കണക്ക് പ്രകാരം നട തുറന്ന ദിവസം മുതൽ നവംബർ 30 വരെ 8.74 ലക്ഷം തീർത്ഥാടകരാണ് അയ്യപ്പ ദർശനത്തിനായി സന്നിധാനത്ത് എത്തിയത്. ഈ രണ്ടു ദിവസത്തെ കണക്ക് കൂടി എടുത്താൽ ആകെ തീർത്ഥാടകരുടെ എണ്ണം 10 ലക്ഷം കടക്കും.ദർശനത്തിന് എത്തുന്ന കുട്ടികളുടെ എണ്ണത്തിലും വർധനവ് ഉണ്ടായിട്ടുണ്ട്.’ കുട്ടികളുടെ കൈയിൽ ബാൻഡ് കെട്ടി രക്ഷിതാവിന്റെ പേരും ഫോൺ നമ്പറും രേഖപ്പെടുത്തിയാണ് കടത്തിവിടുന്നത്. പുൽമേട് വഴി രാവിലെ 7 നും ഉച്ചയ്ക്ക് 2 നും ഇടയിലാണ് പ്രവേശനം. വരും ദിവസംങ്ങളിൽ 70000 ന് മുകളിലാണ് വെർച്വൽ ക്യൂ വഴിയുള്ള ബുക്കിംഗ്. ഭക്തജനത്തിരക്ക് കൂടിയതോടെ വരുമാനവും 70 കോടി കടന്നു.