“ഐ ലവ് യു പാകിസ്ഥാൻ” ! കൊച്ചിയിൽ പിറന്നാൾ ആഘോഷത്തിന് വാങ്ങിയ ബലൂണിൽ പാക് പതാകയും എഴുത്തും ; കട പൂട്ടിച്ച് പോലീസ് ; അന്വേഷണം ആരംഭിച്ചു

കൊച്ചി: പിറന്നാൾ ആഘോഷത്തിന് വാങ്ങിയ ബലൂണിൽ “ഐ ലവ് യു പാകിസ്ഥാൻ” എന്ന എഴുത്തും പതാകയും കണ്ടതായി ഏരൂർ സ്വദേശിയുടെ പരാതി. മകന്റെ പിറന്നാളാഘോഷത്തിന് വാങ്ങിയ ബലൂണിലാണ് പാകിസ്ഥാൻ പതാകയും എഴുത്തും കണ്ടതായി പരാതിക്കാരൻ പറയുന്നത്. യുവാവിന്റെ പരാതിയിൽ തൃപ്പൂണിത്തുറ ഹിൽപാലസ് പൊലീസ് അന്വേഷണം ആരംഭിച്ചു.

തിങ്കളാഴ്ചയാണ് കാസർകോട് സ്വദേശിയുടെ കടയിൽ നിന്ന് യുവാവ് ബലൂണുകൾ വാങ്ങിയത്. പിറന്നാൾ ആഘോഷത്തിനായി ബലൂണുകൾ വീർപ്പിച്ചപ്പോഴാണ് വെളുത്ത ബലൂണിൽ പതാകയും എഴുത്തും കാണുന്നത്. ഉടൻ തന്നെ യുവാവ് പൊലീസിനെ വിവരം അറിയിക്കുകയായിരുന്നു. തുടർന്ന് പൊലീസ് കടയിലെത്തി ബലൂണുകളെല്ലാം കസ്റ്റഡിയിലെടുക്കുകയും കട പൂട്ടിക്കുകയും ചെയ്തു.

എന്നാൽ കടയുടമയ്‌ക്കെതിരെ കേസെടുക്കാൻ പൊലീസ് തയാറായിട്ടില്ല. കുന്നംകുളത്ത് നിന്ന് മൊത്തമായി വാങ്ങിയതാണ് ബലൂണുകളെന്നാണ് കടയുടമ മൊഴി നൽകിയത്. ബലൂൺ പാക്കറ്റിൽ നിർമ്മാതാവിന്റെ വിശദാംശങ്ങൾ രേഖപ്പെടുത്തിയിട്ടില്ലെന്നും പൊലീസ് പറയുന്നു.